PS dhe PD në Korçë mesazhe për festën e Pashkëve

20 Prill 2025, 14:20, Aktualitet CNA

Në këtë të diel të shënuar të Pashkëve, drejtuesit lokalë në Korçë kanë përcjellë urimet e tyre për besimtarët e krishterë dhe të gjithë qytetarët, duke vlerësuar rëndësinë shpirtërore dhe simbolikën që kjo festë përçon.

Nga institucionet vendore, Pashkët janë cilësuar si një ditë e bekuar, që sjell me vete mesazhin e fitores së jetës mbi vdekjen, të ngjalljes së shpresës dhe besimit për ditë më të mira.

Drejtuesi politik i PS për qarkun e Korçës, Niko Peleshi, zgjodhi të vendosë qytetarët në qendër të kësaj dite të shënuar.

"Gëzuar Pashkën. Pashkë të bardha! Preferoj ta le gëzimin për qytetarët sot, të paktën sot mos flasin politikanët por qytetarët."

Kryebashkiaku i Korçës, Sotiraq Filo, krahas urimit, tregoi simbolikën dhe vlerat që kjo festë përçon.

"Sot është një ditë e veçantë për gjithë besimtarët e krishterë të qytetit të Korçës dhe gjithë Shqipërisë. Festa e Pashkës ka një simbolikë shumë të madhe brenda saj, që simbolizon ngjalljen e shpresës dhe besimit për ditë më të mira. Kështu që sot dua ti uroj të gjithë familjeve, besimtarëve të krishterë dhe jo vetëm, gëzuar Pashkën, më shumë shëndet e mbarësi për të gjithë ju. Krishti u ngjall!"

Kryetari i Këshillit të Qarkut të Korçës, Erion Nexhipi, uroi me fjalë të ngrohta këtë festë të ringjalljes.

"Gëzuar Pashën për të gjithë besimtarët kristianë, këtë ditë të bekuar ku jeta triumfoi mbi vdekjen."

Nga radhët e opozitës, urimet janë fokusuar në simbolikën që festa e Pashkës mbart për të gjithë shoqërinë. Drejtuesi politik i PD për Korçën, Ivi Kaso ka vënë theksin te nevoja për më shumë shpresë në zemrat e njerëzve dhe për një të ardhme më të mirë për familjet shqiptare.

"Krishti u ngjall! Gëzuar të gjithë besimtarëve, gjithë qytetarëve të qarkut të Korçës e të gjithë Shqipërisë. Në këtë ditë, në festën më të rëndësishme të gjithë botës kristiane, lindja e Krishtit simbolizon lindjen e shpresës në zemrat tona, në vatrat tona. Uroj mbarësi dhe mirësi për të gjithë duke iu kujtuar të gjithëve që shpresa simbolizon ndryshimin dhe kur nevoja në zemrat e njerëzve për shpresë për ndryshim është e vërtetë, edhe perëndia është bashkë me ta. Gëzuar të gjithëve!"

Një urim i ngrohtë ka ardhur edhe nga kandidati për deputet i PD në Korçë, Kristiano Koçibelli.

"Gëzuar Pashkët! Në këtë ditë të shenjtë uroj gjithë besimtarët ortodoksë dhe gjithë besimtarët në të gjithë Shqipërinë kudo që janë. Qofshin këto Pashkë të mbara, të begata dhe të paqta për të gjitha familjet shqiptare. Gëzuar!"

Myftiu i Korçës, Ledian Cikalleshi, ka marrë pjesë në urimet zyrtare, duke vënë theksin te rëndësia e bashkëjetesës fetare dhe e solidaritetit mes komuniteteve. Ai theksoi se festa merr kuptim të plotë vetëm kur urimi shkon përtej besimit dhe bëhet pjesë e kulturës qytetare që na bashkon si shoqëri. Në mesazhin e tij, ai theksoi se ashtu si në ditët e gëzimit, edhe në ato të vështira, jemi më të fortë kur jemi pranë njëri-tjetrin.

"Me rastin e festës së Pashkës ne ishim sot dhe sapo shprehëm urimet, përcollëm pjesën e detyrës qytetare që gjithmonë na karakterizon, ku urojmë komunitetet për festat e tyre. Normalisht është një nga ato festat e mëdha që ka komuniteti ortodoks dhe gjitha komunitetet në Shqipëri e në zonën e Korçës, e në mbarë botën. Edhe kur kemi ne festat tona komunitetet përkatëse vijnë dhe na urojnë dhe kjo është një nga ato gjërat e bukura që na karakterizojnë sepse festat nuk bëhen të bukura nëse ne nuk e urojmë njëri tjetrin, e nuk jemi të gjithë të pranishëm me urime pranë njëri tjetrit. Po ashtu, edhe kur kemi momente të vështira nuk lehtësohet dhimbja nëse nuk jemi pranë njëri tjetrit. Me këtë filozofi jemi përpjekur të tregojmë atë respektin dhe ti uroj dhe njëherë të gjithë besimtarëve ortodoksë, katolikë dhe protestantë në të gjithë Shqipërinë, gëzuar Pashkët. Paçi festa sa më të gëzuara në familjet tuaja!"

Pashkët janë pritur me gëzim në të gjithë qytetin, ndërsa besimtarët janë mbledhur në kishat e Korçës për të ndjekur meshën e shenjtë dhe për të festuar së bashku me familjet e tyre. Atmosfera festive dhe fryma e bashkimit kanë dominuar në këtë ditë të veçantë për botën e krishterë./ CNA