E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Projekti për aksin Milot-Fier/ Ramës i “djegin” tenderat

2 Gusht 2022, 11:11, Aktualitet CNA

Sot, gjatë një konference për mediat, zëvendëskryeministrja Belinda Balluku, ka hapur garën për projektin e aksit Milot-Fier, pjesë e Korridorit Blu.

Pjesë e konferencës ka qenë edhe kryeministri Edi Rama, i cili e ka quajtur këtë projekt me një rëndësi shumë të madhe që do të ndikojë në ekonominë dhe turizmin e vendit tonë.

Teksa ka folur për këtë projekt, Rama është kujdesur të nënvizojë, se për këtë projekt gara do të jetë e pastër dhe e sukseshme, dhe jo me tendera të parafabrikuara.

"Gara do jetë e suksesshme, për ata që thanë për një tender të parafabrikuar, për korrupsion, vrimë e madhe në ujë se gara u bë që edhe një kompani shumë e madhe që u paraqit nuk e mori dot për shkak se oferta e saj, nuk ishte në interes të vendit, me afate të gjata dhe kërkesa që nuk i plotësonim", tha Rama.

Më tej ai ka thënë, se puna ka vazhduar edhe për aeroportet, ku përmend se aeroporti i Mynihut, që është edhe operatori i parashikuar për Vlorën ka lançuar një tender të vetin atje për sa u përket mjeteve të logjistikës së operimit, gjë që garanton kredibilitetin dhe standardin e aeroportit.

“Korridori blu do t’u shërbejë të gjitha zonave që janë rreth këtij korridori, do t’i shërbejë bujqësisë dhe turizmit, do t’i shërbejë një transformimi ekonomik dhe social dhe do t’i shërbejë lëvizjes në Unazën më të madhe që është Unaza e Mesdheut. Do ta bëjë Shqipërinë më të aksesueshme nga turistët përmes tokës dhe do t’i japë fund kësaj periudhe dhjetëra vjeçare vështirësish në këtë aks, sidomos nga kthesa e Kamzës apo Kashari, lart në Milot, Lezhë dhe drejt Shkodrës ku problemet e sigurisë janë evidente. Do të jetë një aks me certifikatë të BE-së në sensin që nuk do të ketë nga ato trampolinat, pishinat, depot, magazinat që pozojnë në dy anët e rrugës duke krijuar një rrezik. Do të jetë një aks shpejtësie dhe do të jetë një vlerë e shtuar e lëvizjes nga Rruga e Kombit drejt Durrësit. Nuk është i gjithë segmenti, është një pjesë e tij. Segmenti vazhdon më tej në pjesën juglindore të vendit, por është pjesa më strategjike dhe kritike e korridorit blu. Gara do të jetë e suksesshme nga mënyra si është realizuar. Me këtë korridor mbyllet një pjesë e madhe e rrjetit kryesor të Shqipërisë. Korridori 8 do të ketë çdo standard. Faza tjetër është faza e hekurudhave. Aeroportet janë të gjitha në proces. Aeroporti i Mynihut, që është edhe operatori i parashikuar për Vlorën ka lançuar një tender të vetin atje për sa u përket mjeteve të logjistikës së operimit, që gjë garanton kredibilitetin dhe standardin e aeroportit. Konfirmon gjithashtu edhe suksesin e atij projekti”, tha Rama./A.E-CNA.al