“Prodhimi i rrushit këtë vit, në nivel dhe cilësi të lartë”

26 Tetor 2024, 09:51, Aktualitet CNA

“Prodhimi i rrushit këtë vit, në nivel dhe cilësi

Viti 2024 ka rezultuar i mbarë për kantinat e verës për prodhimin e rrushit. Amir Pupa, nga Kantina Pupa, pohon se cilësia e prodhimit të rrushit ka qenë e lartë çka premton një vit të mbarë edhe për verën.

Si erdhi propozimi për pjesëmarrjen në World Tasting Championship dhe çfarë do të thotë pjesëmarrja në këtë event për kantinën tuaj?

Propozimi erdhi nga një enolog me origjinë shqiptare që jeton në Francë, i cili përzgjodhi edhe verërat e kantinës sonë për një aktivitet siç ishte Kampionati Botëror i Degustimit.

Për ne është një vlerësim i madh që të marrim pjesë dhe jemi shumë krenarë që kantina jonë dhe verërat me rrush autokton të Beratit marrin pjesë në këtë degustim të përmasave botërore.

Ku konsiston kjo pjesëmarrje sa u takon etiketave që keni?

Etiketat tona dalin nga disa varietete rrushi shumë të vjetra në Berat, që tashmë kanë një potencial të madh për prodhimin e verës. Janë unike, nuk i gjen dot askund dhe japin verëra me struktura dhe aroma të veçanta.

Si ka qenë viti 2024 për ju në rritjen e frekuentimit dhe konsumit si efekt i turizmit, duke pasur parasysh ecurinë pozitive që ka pasur ndërlidhja e dy sektorëve, sidomos në dy vitet e shkuara?

Viti 2024 ka qenë i jashtëzakonshëm dhe ka pasur frekuentim masiv nga e gjithë bota, por edhe vendasit të cilët kanë konsumuar në kantinën tonë, verë, por jo vetëm, pasi kemi si pjesë të integruar edhe restorantin.

Si paraqitet ky vit për kantinën tua për prodhimin e rrushit?

Prodhimi i rrushit këtë vit është në nivel dhe cilësi të lartë dhe të qëndrueshëm.

Cilat janë disa nga sfidat e sektorit që mendoni se kanë nevojë për vëmendje dhe si mund të nxitet edhe më shumë turizmi i verës, që është një segment me potencial për rritje në vend?

Sfidat e sektorit të verës janë disa, por mendoj se së pari duhet të ketë politika që të nxisin praninë e verës shqiptare në çdo restorant. Një turist, kur vjen në Shqipëri, kërkon verë autoktone dhe jo verë importi që prodhohet jashtë dhe vjen në Shqipëri.

Sa i përket turizmit të verës, tashmë ai është realitet në Berat ku dhe kantina jonë pret turistë nga e gjithë bota, të cilët janë admirues të verës./ Monitor.al