E fundit!

08:49 Aktualitet

25 ditë protesta/ Rama mbledh drejtuesit politikë në qarqe dhe kryebashkiakët

Kryeministri Edi Rama, do të zhvillojë sot dy takime të rë...

Presionet dhe kërcënimet/ Përgjigjet e prokurorit të hekurt ndaj politikës

1 Janar 2026, 16:00, Aktualitet CNA

Presionet dhe kërcënimet/ Përgjigjet e prokurorit të hekurt

Që prej zgjedhjes së tij në dhjetor të vitit 2022 dhe deri në përfundimin e mandatit të tij trevjeçar në krye të SPAK-ut, Altin Dumani ka qenë një nga prokurorët më të shënjestruar dhe të sulmuar nga politika.

Prej vitesh në detyrë, përgjigjia e tij ndaj sulmeve të përditshme ishin hetimet e dosjeve të nxehta, çuarja pas hekurave të zyrtarëve të lartë dhe forcimi i parimit të këtij institucioni që “Askush nuk është mbi ligjin”.

Gjatë drejtimit të tij miti i pandëshkueshmërisë u zhduk. Altin Dumani pati mbështetjen e SHBA dhe BE të cilat herë pas here në raportet e tyre nënvizuan rezultatet dhe arritjet e SPAK-ut nën drejtimin e Altin Dumanit.

SPAK-u me Dumanin në krye korri sukses në luftën kundër korrupsionit dhe krimit të organizuar.

Në prag të përfundimit të mandatit të tij, Altin Dumani vendosi t’i jepte përgjigje politikës dhe sulmeve që ishin bërë ndaj tij përgjatë trevjeçarit që kishte drejtuar SPAK-un.

Në një nga daljet e tij publike, Dumani foli për kërcënimet që marrin prokurorët nga politika.

Dumani tha se kjo ndodh nga mëngjesi deri në darkë ku politika kërcënon me emra të përveçëm dhe familjarë prokurorët e SPAK-ut.

“Sa i takon politikës jeni vetë dëshmitarë nga mëngjesi në darkë prokurorë me emra të përveçëm dhe familjarësh kërcënohen, baltosen, fyen. Kjo është mënyrë kërcënimi. Ne jemi mjaftueshëm të përgatitur për t’i përballuar këto kërcënime ky është një realitet që s’mund të rri pa e thënë. Politikisht dhe çfarë është thënë publikisht nga politika në vlerësimin tim janë mjaftueshëm për t'u quajtur kërcënime”, shprehej Dumani.

Këtë e kishte shprehur edhe në raportin e tij në Kuvend.

“Sa u përket problematikave, në mënyrë të përmbledhur po cilësoj: Vijon një presion i jashtëm nga aktorë politikë, mediatikë dhe krimi i organizuar, që rrezikon integritetin e institucionit dhe prokurorëve. Ky shqetësim kërkon reagim të koordinuar institucional për mbrojtjen e pavarësisë kushtetuese të SPAK-ut. Ka një mungesë të theksuar ligjore dhe paqartësi për situatën e prokurorit pas përfundimit të mandatit, që krijon pasiguri dhe mund të cenojë vijimit e mëtejshëm të hetimeve dhe mund të ndikojë në cilësinë e hetimeve. Mbetet shqetësues edhe numri i ulët i raportimeve nga institucionet. Kjo përbën një sfidë për SPAK-un”,-tha Dumani.

Prokurori Altin Dumani po ashtu iu përgjigj sulmeve të kreut të PD-së, Sali Berisha.

“Ajo që them është kjo që e para prokurorët janë të pavarur, janë zotët e çështjes, vendosin fatin e hetimeve. Si drejtues kam ofruar për rastin e çështjes solidarizimin tim dhe ndihmën time duke u përfshirë në hetime. Asgjë nuk qëndron dhe nuk është e vërtetë”, u shpreh ai.

Dumani theksoi edhe një herë që për prokurorët dhe SPAK-un nuk ka të paprekshëm përfshirë edhe kryeministrin Edi Rama.

"Për mua dhe prokurorët e Posaçëm nuk ka persona të paprekshëm. Në rast se ka prova për kryerjen e një krimi ushtrohet ndjekja penale edhe ndaj kryeministrit. Edhe ndaj kujtdo qoftë. Në rast se ka prova nuk ka asnjë pengesë apo ndalim ligjor që të mos ushtrojmë ndjekjen penale ndaj kryeministrit. Vetëm nëse ka prova për kryerjen e një vepre penale", u shpreh Dumani.

Altin Dumani e ngriti SPAK-un në një standard tjetër, duke krijuar besueshmëri të madhe nga qytetarët. Në tri vite në drejtimin e tij, mund të themi që SPAK-u përjetoi epokën e artë./ CNA