Polici dha opinione për denoncimin e abuzimit seksual/ Rrumbullaku jep urdhër të prerë, pezullohet nga detyra

15 Shtator 2022, 19:36, Aktualitet CNA

Polici dha opinione për denoncimin e abuzimit seksual/ Rrumbullaku jep

Polici i filmuar nga kamerat e "Fiks Fare"

Autoritetet janë vënë menjëherë në lëvizje pas pamjeve të transmetuara mbrëmjen e djeshme në emisionin investigativ "Fiks Fare", në të cilat shfaqet një punonjës policie duke dhënë mendime për një rast, për të cilin dyshohet se një shtetas ngacmon seksualisht vajzën e tij me aftësi të veçanta.

Blutë informojnë se drejtori i përgjithshëm i policisë së shtetit, Muhamet Rrumbullaku, ka urdhëruar nisjen e hetimit për shkelje të rëndë disiplinore, për punonjësin e policisë me iniciale F.H., me detyrë Specialist i Policimit në Komunitet.

Ky i fundit është pezulluar nga detyra, ndërsa policia distancohet nga qëndrimet e punonjësit.

Njoftimi i plotë i policisë:

Në lidhje me pamjet e transmetuara mbrëmjen e djeshme në emisionin investigativ "Fiks Fare", në të cilat shfaqet një punonjës policie duke dhënë mendime dhe deklarata personale, për një rast, për të cilin dyshohet se një shtetas ngacmon seksualisht vajzën e tij me aftësi të veçanta, ju informojmë se:

Fiks Fare/ Djali akuzon babanë: Po abuzonte seksualisht me motrën, është me aftësi të kufizuara
14 Shtator, 20:55

Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale, për nisjen e hetimit disiplinor për shkelje të rëndë disiplinore, për punonjësin e Policisë, shtetasin F. H., me detyrë Specialist i Policimit në Komunitet.

Punonjësi i Policisë, gjatë filmimeve për realizimin e emisionit investigativ, ka shprehur mendimet e tij personale rreth një çështjeje e cila është aktualisht nën hetim, duke kryer kështu shkelje të rëndë. Drejtori i Drejtorisë Vendore të Policisë Fier ka bërë pezullimin e menjëhershëm nga detyra të punonjësit të Policisë, shtetasit F. H., për shkeljen e kryer.

Theksojmë se opinionet e punonjësit të Policisë tashmë të pezulluar, nuk përfaqësojnë qëndrimin, vlerësimin dhe sqarimin zyrtar të strukturave të Policisë së Fierit.

Në bashkëpunim me Prokurorinë pranë Gjykatës së Rrethit Gjyqësor Fier, vijon puna hetimore për zbardhjen dhe dokumentimin e plotë me prova ligjore të rastit të transmetuar në emisionin investigativ.

Policia e Shtetit falënderon median dhe qytetarët dhe i fton sërish ata që të denoncojnë çdo rast të paligjshmërive./ B.A. - CNA.al