web counter
LEXO PA REKLAMA!

SHKARKO APP

App Store
Google Play

Jetën ia kushtoi teatrit dhe kinematografisë/ Reshat Arbana, feston 82-vjetorin e lindjes

15 Shtator 2022, 11:53, Aktualitet CNA

Artisti i papërsetishëm, Reshat Arbana, feston sot 82-vjetorin e lindjes. Aktori i kinematografisë shqiptare ka lindur më 15 shtator të vitit 1940 në Tiranë.

Reshat Arbana ka interpretuar rreth 35 personazhe në filma dhe teatër.

Roli i parë i Arbanës ishte në 1963. Pasi mbaroi studimet në shkollën e aktrimit "Aleksandër Mojsiu", pranë Teatrit Kombëtar të Shqipërisë, në 1968 Arbana filloi të punonte në radio "Tirana".

Nga 1977 deri në kohën e daljes në pension, ai punoi si aktor në Teatrin Kombëtar.

Arbana është dalluar për interpretimin e tij mjeshtëror të roleve të tij.

Disa nga rolet që ka luajtur janë Samiu te “Fije që priten”, kryetari i bashkisë te “Gjeneral gramafoni”, Bimbashi te “Liri a vdekje”, Isa Boletini te “Nëntori i dytë”, Ahmeti te “Dora e ngrohtë” dhe shumë role të tjera.

Disa vite, pasi doli në pension, Reshat Arbana do të rikthehej si protagonist te “Streha e të harruarve” e dramaturgut Ruzhdi Pulaha me regji të Mihal Luarasit.

Më 7 tetor 2011 Presidenti i Republikës, Bamir Topi, i akordoi zotit Reshat Arbana Urdhrin “Nderi i Kombit” me motivacionin: “Aktorit të shquar të teatrit dhe kinematografisë, i cili me interpretimin mjeshtëror dhe origjinalitetin e tij u bë një artist popullor e shumë i dashur për publikun, rolet e të cilit kanë pasuruar me vlera të paçmueshme kulturën kombëtare”.

Por përtej karrierës së tij në fushën e aktrimit, ai ka qenë dhe do të mbetet zëri më i bukur i dhjetëra poezive, prozave dhe veprave të mëdha./CNA.al

 

 





Lajmet e fundit nga