web counter
LEXO PA REKLAMA!

SHKARKO APP

App Store
Google Play

Përmbytjet në Shkodër/ Si paraqitet situata në vend për 24 orët e fundit

9 Janar 2026, 08:59, Aktualitet CNA
Përmbytjet në Shkodër/ Si paraqitet situata në vend për
Foto ilustruese

Situata në Qarkun Shkodër paraqitet e qetë, nën monitorim të vazhdueshëm nga strukturat e Emergjencave Civile.

Situata hidrometeorologjike në territorin e Qarkut Shkodër paraqitet e qetë dhe e stabilizuar, sipas raportimit zyrtar të datës 09.01.2026 nga bashkitë, strukturat e Mbrojtjes Civile dhe institucionet përgjegjëse.

Në Bashkinë Shkodër nuk raportohen problematika të Emergjencave Civile. Në njësinë administrative Dajç, kuota e ujit shënohet në 6.20 metra, ndërsa në Urën e Vjetër të Bunës niveli i ujit mbetet nën kuotën kritike pa rritje të mëtejshme. Edhe në Urën e Bahçallekut, niveli i lumit Drin ka pësuar rënie dhe vlerësohet nën kuotën kritike. Në fshatin Obot vijon të ketë prezencë uji në rrugën kryesore, ku Forcat e Armatosura me mjete të kalueshmërisë së lartë po asistojnë banorët në lëvizje.

Në Bashkinë Vau i Dejës, Malësi e Madhe, Pukë dhe Fushë-Arrëz situata paraqitet e qetë, pa reshje shiu gjatë natës dhe pa problematika të raportuara. Në Malësinë e Madhe është evidentuar tërheqje e ujit në zonën “Rreze e Veshtit”, njësia administrative Kastrat, ku po punohet për rikthimin e aksesit të plotë.

Sipas Drejtorisë së Ujitjes dhe Kullimit Lezhë, hidrovorët në Vilun dhe Casi po funksionojnë me kapacitet të plotë, ndërsa argjinaturat, kanalet kulluese dhe diga e Rezervuarit të Shkodrës nuk paraqesin problematika. Lumenjtë Kir dhe Gjadër kanë shënuar rënie të ndjeshme të prurjeve, duke ndihmuar në stabilizimin e situatës.

Reparti Ushtarak Vau i Dejës vijon angazhimin në fshatin Obot me mjete dhe efektivë, ndërsa Prefektura e Qarkut Shkodër mbetet në gatishmëri dhe nën monitorim të vazhdueshëm për çdo zhvillim të mundshëm./ CNA





Lajmet e fundit nga