Ola Xama tregon si u kthye në shënjestrën e mediave të Veliajt/ Kur nisën sulmet

12 Mars 2024, 07:46, Aktualitet CNA

Ola Xama tregon si u kthye në shënjestrën e mediave të

Gazetarja Ola Xama ka folur për sulmet që i janë bërë nga mediat pranë Veliajt pas shkrimeve që ajo ka bërë në lidhje me inceneratorët dhe si përfshihet kryetari i Bashkisë, Erion Veliaj.

E ftuar në emisionin “Të paekspozuarit” me Ylli Rakipin, Xama ka deklaruar se sulmet kanë nisur që në korrik të vitit 2023 ku ajo raportoi për Veliajn, ku flitej për ekspozimin në procedurën e inceneratorit të Tiranës.

Që prej ditës së nesërme ajo thekson se nisën sulmet nga disa media, të cilat e quanin të paguar, ndërsa merr mesazhin nga Veliaj, i cili e quan vrasëse me pagesë.

Më pas ajo tregon se nisën edhe sulmet personale, familjare.

"Sulmet kanë nisur në korrik të vitit 2023, pas një shkrimi në BIRN ku raportoja për kryetarin e Bashkisë së Tiranës, ku flitej për ekspozimin në procedurën e inceneratorit të Tiranës, të Erion Veliajt. Unë kam zbatuar dhe ndjekur të gjitha standardet e raportimit të mirë, i kam kërkuar koment. Ai nuk u përgjigj. Të nesërmen disa media nisën sulmin duke më quajtur të paguar. Pastaj Veliaj më dërgon disa mesazhe, që më quan vrasëse me pagesë.

Në fundjavë gazeta 'Dita' hapet me një titull ku më quan kontraktore, sikur jam vrasëse me pagesë, duke përdorur të njëjtën gjuhë si Veliaj.

Unë mbi dosjen e SPAK-ut kam bërë edhe artikuj të tjerë, për Arben Ahmetajn dhe për pastrimin e parave. Quhem e paguar nga Ahmetaj, kur unë kam shkruar edhe për akuzat e SPAK-ut ndaj Ahmetajt.

Sulmet kanë vijuar dhe nuk janë marrë vetëm me mua, si një grua dhe nënë, që më cenojnë moralisht, por edhe bashkëshortin tim, familjarë të mi, sikur unë ndikohem nga punët e bashkëshortit tim, që ai të marrë tenderë. Të gjithë mund t’i kontrollojnë që nuk janë të vërteta. Unë dorëzova një padi lidhur me këtë çështje.

Nuk dua të viktimizohem, por asnjëherë nuk kam ngatërruar profesionin me akuzat dhe me marrjen me jetën personale me jetën e dikujt, nëse nuk ka interes publik.

Vendosa të bëj padi civile dhe pas kësaj sulmi ishte akoma edhe më i egër, ku më etiketojnë si kriminele me dy emra, pse kam marrë mbiemrin e bashkëshortit. Cilësohem si person që ka udhëtuar drejt Dubait, duke u bërë insinuata", tha ndër të tjera Xama./ CNA