web counter
LEXO PA REKLAMA!

SHKARKO APP

App Store
Google Play

E fundit!

x

"Natyra duhet mbrojtur"/ Dita e katërt e protestës në Korçë, turisti zviceran u bashkohet qytetarëve

8 Qershor 2026, 19:41, Aktualitet CNA

"Natyra duhet mbrojtur"/ Dita e katërt e protestës në

Për të katërtën ditë radhazi, qytetarë, aktivistë të mjedisit dhe mbështetës të kauzës për mbrojtjen e natyrës janë mbledhur në Korçë për të kundërshtuar projektin turistik që parashikohet të ndërtohet në zonën e Zvërnecit. Protestuesit kanë kërkuar më shumë transparencë për projektin dhe kanë ngritur shqetësimin se ndërhyrjet në një nga ekosistemet më të rëndësishme të vendit mund të sjellin pasoja të pakthyeshme për biodiversitetin dhe pasuritë natyrore të zonës.

Ndërsa ditët e mëparshme protesta ka mbledhur kryesisht qytetarë dhe aktivistë shqiptarë, këtë herë vëmendjen e ka tërhequr prania e një turisti nga Zvicra, i cili vendosi t’i bashkohej tubimit për të shprehur mbështetjen e tij ndaj mbrojtjes së mjedisit. Ai ndodhet prej disa ditësh në Korçë për pushime, por pasi u njoh me debatin dhe kundërshtimet që ka shkaktuar projekti në Zvërnec, vendosi të jetë i pranishëm në protestë.

"Natyra duhet mbrojtur"/ Dita e katërt e protestës në

Turisti zviceran tregoi se ishte informuar për protestën përmes lajmeve dhe mediave shqiptare, ndërsa theksoi se, edhe pse si shtetas i huaj nuk e konsideron veten pjesë të debatit politik në Shqipëri, ai ndjen detyrimin moral për të mbështetur çdo nismë që synon mbrojtjen e natyrës.

 

“Unë u informova nga lajmet dhe gazetat. Unë jam këtu për pushim dhe jam në Korçë, dhe kam lexuar që ka protestë. Unë jam nga Zvicra. Për mua është dita e tretë që jam në Korçë. Unë nuk kam të drejtë të protestojë në një shtet të huaj, por unë jam këtu për të mbështetur njerëzit këtu”, tha turisti.

 

Ai tregoi se gjatë udhëtimeve të tij në Shqipëri ka vizituar disa prej zonave më të njohura natyrore të vendit. Vetëm një ditë më parë kishte qenë në Prespën e Vogël, ku kishte parë nga afër pelikanët, një eksperiencë që e përshkroi si të rrallë dhe mbresëlënëse. Duke folur për bukuritë natyrore të vendit, turisti u ndal te vizita e fundit në Prespë dhe tek përvoja e tij në Zvërnec.

 

“Dje unë isha në liqenin e Prespës së Vogël, dhe dje kam parë duke fluturuar pelikanët, dhe ishte diçka jashtëzakonisht shumë e bukur. Dhe vitin e kaluar unë isha në Zvërnec dhe atje unë kam parë pelikanët. Dhe është një natyrë shumë, shumë e bukur, ka shumë vende në Shqipëri që janë shumë të bukura. Dhe për këtë arsye, edhe për këtë që njerëzit këtu kanë një zemër shumë të mirë, unë jam këtu për pushim”, u shpreh turisti.

 

Sipas tij, Shqipëria zotëron pasuri natyrore të jashtëzakonshme që përbëjnë një vlerë jo vetëm për vendin, por edhe për turistët e huaj që e vizitojnë çdo vit. Pikërisht për këtë arsye, ai tha se çdo projekt zhvillimi duhet të marrë në konsideratë ruajtjen e mjedisit dhe të mos cënojë ekuilibrat natyrorë. Ai theksoi se zhvillimi ekonomik dhe mbrojtja e natyrës nuk duhet të përjashtojnë njëra-tjetrën, por të ecin paralelisht.

 

“Dhe për këtë arsye unë shpresoj që njerëzit kanë mundësi të thonë diçka kundër këtij projekti në Zvërnec, sepse në Zvicër ne kemi mësuar që zhvillimi ekonomik dhe mbrojtja e natyrës duhet të shkojnë dorë për dore, dhe në një nivel që të dyja nuk duhet të jenë të kundërta, se të dyja janë shumë të rëndësishme. Për këtë arsye unë shpresoj që Shqipëria ka mundësi të shkojë me ligj dhe ndoshta ky projekt të shkojë me ligj”, tha ai.

 

Ndërsa përgatitej të vijonte udhëtimin drejt bregdetit shqiptar, turisti nuk e fshehu dashurinë që ka krijuar për vendin. Ai tregoi se kjo nuk është vizita e tij e parë, por hera e pesëmbëdhjetë që udhëton në Shqipëri, një vend që sipas tij vazhdon ta befasojë me bukuritë natyrore dhe mikpritjen e njerëzve. Në fund, ai rrëfeu lidhjen e veçantë që ka krijuar me Shqipërinë dhe gjuhën shqipe.

 

“Nesër unë shkoj në bregdet, e ndoshta unë do të jem në vende të tjera, ose në Tiranë. Mua më pëlqen Shqipëria shumë. Është një vend shumë i bukur dhe mua më pëlqen shumë të jem këtu. Unë jam vetëm për pushim këtu, unë jam një turist i vërtetë! Unë kam mësuar gjuhën shqipe në kohën e Covid-it, dhe deri tani, kjo është hera e 15-të në Shqipëri, dhe udhëtoj në të gjitha vendet, në male dhe në bregdet”, u shpreh turisti zviceran.

 

Protesta në Korçë pritet të vijojë edhe në ditët në vazhdim, ndërsa organizatorët kërkojnë që zëri i qytetarëve të dëgjohet dhe çdo vendimmarrje për zonat e mbrojtura të kalojë përmes konsultimeve të gjera publike dhe respektimit të standardeve mjedisore.





Lajmet e fundit nga