E fundit!

19:42 Aktualitet

52 ditë protestë kundër qeverisë/ Qytetarët marshojnë drejt Kryeministrisë

Në sheshin “Skënderbej” janë grumbulluar qytetarët për pro...

"Ata që janë në juridiksionin e SPAK-ut apo GJKKO-së nuk përfitojnë"/ Gogu prezanton projektligjin për amnistinë penale

8 Qershor 2026, 11:38, Aktualitet CNA

Ministri i Drejtësisë, Toni Gogu, ka prezantuar në Komisionin për Çështjet Ligjore projektligjin e Amnistisë Penale. Gogu ka sqaruar gjatë fjalës së tij se kush përfiton nga kjo amnisti penale.

Ministri ka sqaruar se të dënuarit për korrupsion, krim të organizuar dhe për çështje që janë në kompetencë të SPAK-ut dhe GJKKO-së nuk përfitojnë nga kjo amnisti.

Sipas tij, ky projektligj bën dallimin me saktësi ligjore mes personit që përbën rrezik për shoqërinë dhe atij personi që shteti vlerëson se është përmbushur qëllimi i dënimit dhe nevojitet të rikthehet në shoqëri.

Ndërkohë bëhet me dije se projektligji pritet të kalojë për votim në seancën plenare të 18 qershorit.

Fjala e Gogut në komision:

Dua ta nis me tre numra. 380 persona fitojnë liri të menjëhershme nga ky projektligj, 900 persona përfitojnë ulje të dënimit dhe 0 persona të dënuar për korrupsion, krim të organizuar dhe për çështje në kompetencë të strukturave të posaçme antikorrupsion, përfitojnë nga kjo amnisti.

Askush që është në juridiksionin e SPAK-ut apo GJKKO-së nuk përfiton nga kjo amnisti. Këta tre numra përmbledhin filozofinë e këtij projektligji.

Ky projektligj nuk e toleron krimin, por dallon me saktësi ligjore mes personit që përbën rrezik për shoqërinë dhe atij personi që shteti vlerëson se është përmbushur qëllimi i dënimit dhe nevojitet të rikthehet në shoqëri.

Ky ligj nuk shuan asnjë të drejtë civile të viktimës. Amnistia prek marrëdhënien mes shtetit dhe autorit të veprës penale. E drejta e viktimës për dëmshpërblim mbetet e pacenuar.

Projektligji vepron në tri drejtime:

- I pari është amnistia nga vuajtja e dënimit, ata amnistohen sipas kritereve:

Të gjithë burrat që janë dënuar deri në 3 vite ose u kanë mbetur për të vuajtur më pak se 3 vite, lirohen menjëherë.

Të gjitha gratë që janë dënuar deri në 4 vite ose u ka mbetur më pak, lirohen menjëherë.

Të gjithë burrat 60 vjeç e sipër dhe të gjitha gratë 50 vjeç e sipër lirohen menjëherë.

Të miturit, 18 vjeç e poshtë në momentin e kryerjes së krimit, lirohen menjëherë.

- Kriteri i dytë ka të bëjë me uljen e dënimit.

Të gjithë të dënuarit marrin 1 vit ulje, ndërkohë që gratë dhe të miturit 1 vit e gjysmë.

- E treta është amnistia nga ndjekja penale.

Pushon procedimi për veprat që dënohen deri në 3 vite, me përjashtimet e përcaktuara:

Asnjë nga përfituesit nuk duhet të ketë kryer vepra të rënda.

Përjashtohen të gjitha vrasjet në rrethana cilësuese, krimet seksuale, trafikimi, terrorizmi, korrupsioni dhe krimi i organizuar, veprat zgjedhore, pastrimi i parave dhe çdo subjekt që është nën juridiksionin e SPAK-ut dhe GJKKO-së.

Në sistemin penitenciar ka 5292 vende, janë akomoduar 4769 persona. Pas amnistisë do të kemi një ulje prej 10% të popullatës së sistemit penitenciar. Nuk është ky efekt qëllimi kryesor i ligjit, por është një pasojë e dëshiruar, sepse na jep mundësinë që, kur të na zvogëlohet numri i të dënuarve, të rritet cilësia e trajtimit për të tjerët. /CNA