Hipokrizia me mediat në Greqi/ Kundërshtohet projekti në Zvërnec, por mirëpritet në Mykonos

8 Qershor 2026, 09:48, Aktualitet CNA

Hipokrizia me mediat në Greqi/ Kundërshtohet projekti në

Një dinamikë kontradiktore po shpaloset mes Shqipërisë dhe Greqisë, ku investimi i Jared Kushner-it, dhëndrit të presidentit amerikan, Donald Trump, në zonat bregdetare të Shqipërisë, ka shërbyer si tregues për të testuar standardet e dyfishta të politikës dhe mediave fqinje.

Sipas raportimeve të fundit në mediat greke "Affinity Partners", edhe Kushner-i po shqyrton tërheqjen nga ishulli i Sazanit dhe projekte të tjera në Shqipëri pas presionit të vazhdueshëm. Mediat greke kanë ndjekur një strategji të mirëfilltë të përbaltjes së investimeve në vendin tonë.

Duke iu referuar shkrimit të "Greek City Times", vërehet se si ky portal u jep zë kundërshtimeve lokale dhe shqetësimeve mjedisore për të justifikuar dështimin e projektit shqiptar. Retorika është ndezur duke implikuar protesta në Zvërnec mbi pretendime për dhunë ndaj një shtetasi të minoritetit grek, duke e kthyer një çështje investimi në një incident diplomatik.

Megjithatë prapaskenat zbulojnë të tjera fakte. E njëjta media që shkruan për ndikimet mjedisore në Shqipëri, i bën jehonë me entuziazëm faktit se: "Në një zhvillim të rëndësishëm për pasuritë e paluajtshme luksoze në Ballkan, burime pranë Gazeta 'Journal' raportojnë se firma e investimeve e Jared Kushner po përgatitet të tërhiqet nga projekti i saj ambicioz në ishullin e Sazanit në Shqipëri. Kompania tani po shikon alternativa në rajon. Greqia thuhet se ka ofruar kushte të veçanta investimi për të tërhequr zhvillime të tilla të profilit të lartë drejt destinacioneve ikonike si Mykonosi."

Pas shkrimeve të tilla në mediat greke, lind pyetja natyrshëm: a ndryshon natyra e investimit të Kushner-it kur ai kalon kufirin?

Nëse projekti i Sazanit dhe zonave bregdetare shqiptare konsiderohet shkatërrues për mjedisin nga këndvështrimi grek, përse i njëjti model zhvillimi i implementuar në Mykonos kthehet në një mundësi strategjike për Athinën zyrtare?

Në këtë lojë të dyfishtë mjedisi duket se është vetëm një instrument politik. Kur investimi synon zhvillimin e Shqipërisë ai etiketohet si kërcënim ekologjik dhe burim konfliktesh etnike, ndërsa kur ai synon përfitimet e tregut grek transformohet në një investim të mirëpritur nga qeveria greke. /CNA