web counter
LEXO PA REKLAMA!

SHKARKO APP

App Store
Google Play

E fundit!

x

Mjerë Korça për deputetët që ka dhe për palo opozitarët e saj

22 Shkurt 2026, 18:05, Politikë CNA

Mjerë Korça për deputetët që ka dhe për palo

Qarku i Korçës ka dhjetë deputetë, gjashtë përfaqësues të Partisë Socialiste dhe katër të Partisë Demokratike.

I pari i listës së deputetëve socialistë është Niko Peleshi, kryetari i Kuvendit, i pasuar nga, Romina Kuko, Genti Lakollari, Ilirian Pendavinji, Bledi Çomo dhe Besa Spaho. I pari i listës së opozitës është Ivi Kaso, i pasuar nga Ledina Alolli, Bledion Nallbati, dhe Fidel Kreka.

Pa i përjashtuar që të gjithë, që mos qofshin deputetë të këtij qarku. Ka gati 48 orë që në rajonin e juglindjes, nga një rrugë dy orëshe tani duhet të bësh shtatë orë të kalosh nga Gramshi, janë anuluar me qindra rezervime, lëvizjet e kamionëve, autobusëve, lëvizje tregtare dhe gjithçka tjetër.

Dhe të dhjetë deputetët nuk dihet ku janë. Mjaftohen maksimumi me ndonjë status në Facebook. Që nga kryetari i kuvendit i pari, i cili duhet të kishte qenë atje në terren.

Po, Niko Peleshi i pari, i pasuar nga deputetët e tjerë të Partisë Socialiste të qarkut të Korçës, pa përjashtim. Edhe Bledi i Pogradecit, edhe Iliri i Maliqit, edhe Besa, edhe Genti i Devollit, të gjithë duhet të ishin atje. Nuk ka pse të njoftojë korçarët Taulant Balla se si po punohet tek rruga, ka ngelur juglindja e bllokuar.

Ku janë deputetët e opozitës që mos qofshin?! Se mirë këta të Partisë Socialiste mund të dalin e mund të mos dalin, do të japin njoftimet siç i nxjerr ARRSH-ja, Policia e Shtetit, e quajnë “situatë emergjente, po merren masa, po punohet, ja kemi mbledhur informacion, shumë shpejt do zgjidhet situata” apo të bëjnë propagandën e tyre të zgjidhjes së problemit dhe pastaj të marrin dekoratat për të mbushur kutitë me vota.

Po të mjerët deputetë të opozitës ku janë?

Ku dreqin është futur Ivi Kaso, i cili duhet të rrinte atje te ura, bashkë me kamerat dhe deputetët e tjerë të opozitës? Çadrën duhet ta ngrinin atje, jo te Kryeministria se është bllokuar juglindja. Ky është momenti që reagon opozita.

Sepse rruga ka shkarë për shkak të papërgjegjshmërisë së firmës së ndërtimit që po ndërton aksin e ri. Për atë është dëmtuar ura, sepse firma që ndërton rrugën ka dhe përgjegjësinë e aksit rrugor ku punon. Nuk mund të ndërtojë një rrugë të re duke shkatërruar e bllokuar dhe penalizuar gjithë juglindjen e vendit me një kosto që mund të shkojë qindra miliona euro.

Deputetët e opozitës flenë gjumë. Ivi Kaso është në Tiranë, shkon bashkë me Bledi Çomon dhe marrin titull "Qytetar Nderi" andej nga Florida. Ai është halli i madh. Se këtej izolohet juglindja, Korçës dhe Pogradecit u anulohen qindra mijëra rezervime, zonave turistike Dardhë-Voskopojë gjithashtu, kjo s’ka rëndësi. Varja kësaj. Mjafton që Ivi të na marrë dekoratën.

Ku është Ledina Alolli? A e di Ledina, që as ambulancat nuk lejohen të kalojnë, që mund të ketë njerëz me probleme shëndetësore, nëna shtatzëna, etj.

Ku është deputeti i Bilishtit, Bledion Nallbati? Apo për t’u rrahur rrugëve me grushta e për të bërë të fortin? Ku është Fidel Kreka, suksesi i madh i fitores në qarkun e Korçës?

Deputet me mesatare 4 pikë ca që nuk del në rrugë të protestojë, të qëndrojë atje 24 orë derisa firma ta riktheje në gjendje të mëparshme rrugën në mënyrë të menjëhershme që të sigurohet lëvizja e lirë e njerëzve dhe e mallrave, sepse ai aks rrugor i bllokuar, dy apo trefishimi i kohës për të lëvizur drejt kryeqytetit, i jep një kosto dhe goditje të madhe Korçës që ekonomikisht mund t’i marrë shpirtin e zhvillimit.

Mirë ata socialistët se janë në pushtet edhe atë punë do bëjnë. Por këta të mjerët e opozitës, këta që janë ku thërret kiameti, mirë intelektuali dhe analfabeti, mirë zonja apo zotëria, po si do kenë fytyrë t’u dalin njerëzve përpara kur nuk bëjnë as më të voglin hap? Këta nuk janë opozitarë, këta janë mjeranë. /CNA





Lajmet e fundit nga