E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit To...

Ministri i Jashtëm turk bën "lolo" Hasanin tonë

29 Janar 2024, 14:52, Aktualitet CNA

Mjafton një konferencë shtypi për të kuptuar se si një ministër i Jashtëm, në rastin konkret, Igli Hasani, kthehet nga një kryediplomat në një "lolo" diplomatik përballë mediave nga një koleg i tij.

“Dhunimin” e Igli Hasanit e ka bërë ministri i Jashtëm turk gjatë një konference shtypi në Tiranë.

“Largoni mbetjet e fundit të FETO-s”, theksoi ministri i Jashtëm i Turqisë, Hakan Fidan.

Ky i fundit ka mbërritur në Tiranë dhe sot ka pasur një konferencë me kolegun Igli Hasani.

Ministri i Jashtëm turk bën "lolo" Hasanin tonë

Hakan Fidan dhe Igli Hasani

Largoni mbetjet e fundit të FETO-s?

Çfarë është ky mesazh që përcjell një ministër i Jashtëm turk në mes të Shqipërisë?

Kush është ministri i Jashtëm turk që të urdhërojë Shqipërinë?

Patjetër, vende partnere. Patjetër që Turqinë mund ta kemi aleate. Kemi dhe lidhje “shpirtërore”, 500 vjet robëri.

Përtej çdo paragjykimi, mbështetja e Turqisë ndaj Shqipërisë, marrëdhënia tregtare dhe aleancat janë shumë të forta, përfshi këtu dhe marrëdhëniet e presidentit turk, Recep Tayyip Erdogan me kryeministrin Edi Rama dhe ish-kryeministrin Sali Berisha.

Por si mundet një ministër i Jashtëm të vijë në mes të Shqipërisë dhe të lëshojë një fjali të tillë dhe homologu të heshtë?

Ministri i Jashtëm turk, Hakan Fidan

Këtë diplomatët mund ta quajnë normale, ai ka të drejtën e tij të flasë, problemi qëndron te ministri ynë i Jashtëm, te ministri Igli Hasani, te përgjigjja që ai duhet të kthente “flakë për flakë”.

Ndërkohë që ministri turk kërkoi largimin e FETO-s që është një çështje e përmendur vite pas vitesh nga autoritetet turke, ministri Igli Hasani filloi të fliste për investimet turke, për shqiptarët e punësuar në kompanitë turke, për numrin e kompanive turke në Shqipëri, për Turqinë mike, etj.

Igli Hasani nuk e kishte fjalinë e duhur për kolegun e tij turk. Të paktën të kishte bërë atë që bëri paraardhësi Ditmir Bushati disa vite më parë, po me një ministër të Jashtëm turk, kur tha se politikën e Shqipërisë apo veprimet e një shteti si Shqipëria nuk mund t’i diktojnë ministrat e Jashtëm të një vendi tjetër.

Ish-Ministri i Jashtëm turk, Mevlut Cavusoglu dhe ish-Ministri i Jashtëm i Shqipërisë, Ditmir Bushati

“Për sa i përket çështjes që ju shtroni, përgjigjja e shtetit shqiptar është ajo përgjigje që i kemi dhënë qoftë Turqisë, por dhe në planin ndërkombëtar. Shqipëria ka qenë një ndër vendet e para që është solidarizuar me çka ndodhi në Turqi, në rrethanat e grushtit të shtetit, por nga ana tjetër është një vend anëtar i NATO-s, është një vend kandidat për në BE, ka aderuar në disa dokumente të rëndësishme ndërkombëtare në fushën e ekstradimit dhe çdo politikë e tillë, ndiqet në rrugë diplomatike dhe assesi në konferenca shtypi”, deklaroi Bushati në tetor të 2018-ës.

Ndaj, sot Igli Hasani është kthyer thjesht në një diplomat "lolo", ku një ministër i Jashtëm i thotë një mesazh dhe ai hesht. Nuk bën dot as atë që ka bërë qeveria, një ministër i tij dje, apo një ministër i tij pardje gjatë kohës që qeveriste Berisha, por kthehen në vasalë, pranojnë poshtërimin.

Ministri i Jashtëm, Igli Hasani

Nuk kishte pse të merrte shpatën dhe t’i binte kokës kolegut turk, por një përgjigje mund t’ia kthente Igli Hasani, një përgjigje ndoshta me shumë diplomaci.

Kjo përgjigje duhej sepse një ministër i Jashtëm i një vendi tjetër po jepte urdhër të drejtpërdrejtë në mes të Tiranës dhe po i thoshte se çfarë duhet të bënim me një organizatë të caktuar që Turqia kishte problemet e saj, ndërkohë që SHBA-ja e konsideron aleate, e Igli Hasani zgjodhi të ishte "loloja" diplomatik përpara ministrit të Jashtëm turk./ CNA