Meshë në Korçë për Kryepeshkopin Janullatos/ “Vepra e tij do të shkruhet me germa të arta”

26 Janar 2025, 13:47, Aktualitet CNA

Meshë në Korçë për Kryepeshkopin Janullatos/

Është mbajtur paraditen e sotme në Katedralen "Ngjallja e Krishtit" në Korçë, paraklisi kushtuar kryepeshkopit Anastas Janullatos. Qindra besimtarë ortodoksë kanë ndjekur meshën e drejtuar nga Atë Ilia Kotnani, ku kanë drejtuar lutje për shpirtin e kryepeshkopit. Me dhimbje e pikëllim të madh, besimtarët ortodoksë ndezën qirinj dhe u lutën për bamirësin dhe drejtuesin shpirtëror të tyre.

Në fjalën e tij për “CNA TV”, Atë Ilia Kotnani theksoi se vepra e tij do të shkruhet me germa të arta, ndërsa shtoi se Kryepeshkopi Janullatos ka shërbyer si një faktor paqeje dhe stabiliteti edhe për Kosovën.

“Nuk gjejmë fjalë ta përshkruajmë largimin nga kjo jetë të kryepeshkopit tonë të dashur Imzot Anastasit. Puna e tij, vepra e tij, do të shkruhen me germa të arta. Që në momentin e ardhjes së tij e derisa u largua nga kjo jetë, gjithmonë në gojën e tij ka pasur fjalë dashurie, respekti, përulësie, dashuri për njëri-tjetrin, dashuri për ata që nuk na duan dhe thënia e tij lapidar mbetet ditën e gurit themeltar mbi kishën tonë 'Ngjallja e Krishtit' të Korçës, ai midis të tjerash tha: 'Edhe gurët që na hodhën në krye, ne i mblodhëm dhe vendosëm të ndërtojmë kisha'.

Po ashtu edhe për luftën në Kosovë, njëkohësisht edhe për dramën kosovare, ai ka qenë një faktor paqeje, stabiliteti, dashurie, miqësie. Kryepeshkopi Anastas mbetet një figurë e gjallë poliedrike, njerëz të tillë si ai rrallë vijnë mbi tokë. Këtë hidhërim që kemi ne e shprehim edhe me lot gëzimi sepse me siguri ai e ka fituar parajsën në mbretërinë e perëndisë.

Ne jemi të sigurtë, të gjitha që bekimet e tij do vazhdojnë të vijnë nga qielli në drejtim të besimit tonë, në drejtim të popullit tonë edhe në drejtim të shtetit tonë edhe mbarë krishtërimit kudo.

Ndaj arsyeja jonë duhet të na dërgojë tek ai që ta imitojmë sadopak atë, të jemi në gjurmët e tij, sepse ai gjithmonë ka mbjellë dashurinë, na ka mbjellë respektin, na ka dhënë bekimet e perëndisë dhe këto le të jenë një gur themeli mbi besimin tonë e të jemi të bashkuar e të vazhdojmë me sukses veprën e tij. I përjetshëm qoftë kujtimi i tij, zoti ta prehë në tendat e të drejtëve! Bekimet e tij të kemi kudo në jetë!”, tha Atë Ilia Kotnani. /CNA