“Përballoi politikën alla shqiptarçe”/ Ramkaj: Hirësia e Tij thoshte “jo”, kur kërcënohej interesi i komunitetit

25 Janar 2025, 15:09, Aktualitet CNA

“Përballoi politikën alla shqiptarçe”/ Ramkaj:

Drejtuesi i Qendrës së Bashkëpunimit Ndërfetar në Elbasan, Dr.Arben Ramkaj e quan një moment reflektimi ndarjen nga jeta të Hirësisë së Tij, Kryepiskopit Anastas Janullatos.

Për Dr. Ramkajn, Janullatos ishte një udhëheqës shpirtëror ortodoks që sakrifikoi gjithçka për të ndërtuar një komunitet të qëndrueshëm dhe të mbështetur në parime.

Sipas Ramkajt Hirësia e Tij ndoshta është ndër klerikët e rrallë që diti të përballonte politikën "alla shqiptarçe", me intrigat dhe absurditetet e saj. Sidomos kur disa politikanë tanë, në raport me fenë, ngjasojnë me personazhet e krijuara nga autori me famë botërore Miguel de Cervantes në veprën "Don Kishoti i Mançës".

Ai thekson se Janullatos nuk ngurroi t’i thoshte "Jo" kur politika kërcënonte interesat e komunitetit që ai shërbente me aq përkushtim.

Ramkaj shton se, ortodoksët humbën një figurë klerikale me peshë botërore, por klerikët e çdo komuniteti mësuan se çfarë do të thotë fe, çfarë do të thotë thellim, përkushtim komunitar dhe besnikëri ndaj dogmës.

“Ndarja nga jeta e kësaj toke e Hirësisë së Tij, Kryepeshkopit të Durrësit, Tiranës dhe gjithë Shqipërisë, është një moment reflektimi.

Ai nuk ishte thjesht një klerik me kombësi greke dhe me nënshtetësi shqiptare që shërbeu në Shqipëri; ai ishte një intelektual i nivelit më të lartë klerikal, një udhëheqës shpirtëror ortodoks që sakrifikoi gjithçka për të ndërtuar një komunitet të qëndrueshëm dhe të mbështetur në parime. Këtë e kam dalluar nga takimet me shumë klerikë ortodoksë, si të brezit të ri, ashtu edhe të moshës së thyer.

Në jetën e tij të gjatë dhe plot sfida, Hirësia e Tij ndoshta është ndër klerikët e rrallë që diti të përballonte politikën "alla shqiptarçe", me intrigat dhe absurditetet e saj. Sidomos kur disa politikanë tanë, në raport me fenë, ngjasojnë me personazhet e krijuara nga autori me famë botërore Miguel de Cervantes në veprën "Don Kishoti i Mançës".

Ai i përballoi këto sfida me mençuri dhe dinjitet. Ai nuk ngurroi t’i thoshte "Jo" kur politika kërcënonte interesat e komunitetit që ai shërbente me aq përkushtim. Ky qëndrim i tij na kujton kolosët e tjerë të besimit, si H. Sabri Koçi dhe Baba Rexhep Selimi, që në momente kyçe ditën të mbrojnë me guxim vlerat dhe besimin.

Kam lexuar disa nga librat e tij, të përkthyer në shqip, të cilët nxisin vlerën e besimit dhe rëndësinë e bashkëjetesës. Nxis çdo klerik të veshur me dije t’i lexojë ato. Ortodoksët humbën një figurë klerikale me peshë botërore, por klerikët e çdo komuniteti mësuan se çfarë do të thotë fe, çfarë do të thotë thellim, përkushtim komunitar dhe besnikëri ndaj dogmës. Duke qenë se jam besimtar i një besimi tjetër real të vendit, i thashë këto fjalë si dëshmi e asaj që kam parë si vëzhgues dhe si njëri që mundohet të jetë i drejtë.

Ngushëllimet e mia më të sinqerta komunitetit ortodoks të Elbasanit dhe mbarë Shqipërisë”, shkruan Ramkaj./ CNA