Mesazhi i fortë i Imzot Joanit në Ditën e Flamurit: Ata që abuzojnë do të dënohen nga Perëndia

28 Nëntor 2024, 11:38, Aktualitet CNA

Mesazhi i fortë i Imzot Joanit në Ditën e Flamurit: Ata që

Imzot Joan Pelushi

Qyteti i Korçës e ka traditë prej vitesh që në Katedralen ortodokse "Ngjallja e Krishtit" të mbahet mesha e celebrimit të flamurit në 28 Nëntor.

Në 112 vjetorin e Pavarësisë së Shqipërisë, u mbajt këtë të enjte, ceremonia e veçantë e meshës së flamurit, e kryesuar nga Mitropoliti i Korçës Imzot Joan Pelushi.

Qytetarë e besimtarë të shumtë janë mbledhur për të nderuar simbolin e pavarësisë së vendit, për të respektuar ata që dhanë jetën dhe kontributin e paçmuar për ta bërë Shqipërinë shtet të pavarur.

Në fjalën e tij për besimtarët dhe qytetarët korçarë, Imzot Joan Pelushi ka thënë se sot është një ditë kujtese, ku të gjithë përkujtojnë dy gjëra të rëndësishme. Sipas tij, nuk mjafton vetëm falenderimi ndaj perëndisë por të gjithë duhet të jemi të përgjegjshëm për t'u kujdesur për vendin tonë.

"Dita e sotme është një ditë kujtese. Mblidhemi çdo vit për të përkujtuar dy gjëra shumë të rëndësishme. E para, për të falënderuar perëndinë që na ka dhënë një vend të bukur që ka gjithçka, male, fusha, kodra, lumenj, por ne jemi kujdestarët e kësaj. Ne jemi këtu për tu kujdesur për vendin. Faleminderit perëndisë por falenderimi nuk mjafton. Duhet përgjegjshmëria, kemi detyrën për ta lulëzuar këtë vend, sepse çdo njeri që mendon e thotë që "e dua perëndinë" e nuk do vendin që e ka lindur dhe rritur, ai njeri është gënjeshtar", u shpreh Imzot Joan Pelushi.

“Është e pamundur të duash zotin e mos duash atdheun”- thekson Imzot Joan Pelushi.

Ndër të tjera ai bën thirrje që çdo njeri duhet të bëjë vepra të mira e jo të abuzojë e shpërdorojë.

“E sikur të flasim gjithë ditën për atdheun, dashuria e vërtetë nuk është vetëm ndjenjë por vepër. Ata njerëz që bëjnë vepra të mira, janë ata që quhen kujdestarë të mirë dhe shpërblehen nga perëndia. Ndërsa ata që abuzojnë, quhen kujdestarët e këqinj dhe do të dënohen nga perëndia.

Prandaj, në këtë ditë të nderuar për popullin tonë, le ta kemi parasysh gjithmonë së pari falenderimin dhe së dyti përgjegjësinë që kemi për ta lulëzuar këtë vend”, theksoi Imzot Joan Pelushi.

Në këtë ditë të shënuar, mitropoliti i Korçës ka shprehur urimin e tij për popullin duke u lutur që perëndia ta bekojë vendin tonë e ta ndriçojë popullin shqiptar.

“Gëzuar të gjithë për shumë vjet! Lutem që perëndia ta bekojë vendin tonë dhe ta ndriçojë popullin tonë! Amin!”, tha Imzot Joan Pelushi.

Mesha e celebrimit të flamurit u mbajt në Katedralen e Korçës, ku dhjetra besimtarë e qytetarë korçarë kanë qenë pjesë e kësaj ceremonie për të respektuar e nderuar simbolin e Pavarësisë./ CNA