SPAK zbulon detaje/ Si u pajisën me “SKY ECC” politikanët, binesmenët dhe “kokat” e krimit

27 Nëntor 2024, 22:07, Aktualitet CNA

SPAK zbulon detaje/ Si u pajisën me “SKY ECC” politikanët,

Foto ilustruese, marrë nga Google

SPAK ka zbuluar detaje për aplikacionin “SKY ECC”, të cilin e kanë përdorur “kokat” e krimit, politikanë dhe biznesmenë.

Në dosjen e Prokurorisë së Posaçme për grupin e Suel Çelës tregohet se si ata u pajisën me telefonat që kishin aplikacionin “SKY ECC”.

SPAK thotë se aplikacioni reklamohej në faqen online të “SKYECC”, me të cilën mund të komunikohej me anë të së email-it.

SPAK

Personat e interesuar e merrnin telefonin fizikisht dhe paratë mund t’i paguanin në dorë, por edhe me mënyra të tjera, si “PayPal”, “Bitcoin” dhe transferta bankare.

“Aparatet telefonike të pajisur dhe me aplikacionin SKY/ECC reklamoheshin edhe në faqen www.skyecc.store, ku klienti interesohej me anë të adresës së tij të emailit dhe më pas u caktohej një rishitës i shërbimit SKY/ECC ku mund të tërhiqnin aparatin telefonik. Pagesa për tu pajisur me aparat telefonik SKY/ECC bëhej me para në dorë. Në faqen e internetit përdoreshin edhe mënyra të tjera pagese, paypal, bitcoin dhe transfertë bankare. Në faqen e internetit ku reklamohej SKY/ECC, shpjegohej se ky aplikacion përdoret për një komunikim të sigurtë të kriptuar "end-to-end" dhe i reziston përpjekjeve që mund të bëjnë autoritetet ligjzbatuese për të thyer kodimin e mesazheve”, theksohet në dosje.

Detaje të dhëna nga SPAK-u në dosjen hetimore

Por ky aplikacion u zbulua nga autoritetet belge dhe holandeze, të cilat kërkuan informacion nga SKY ECC, pasi u zbuluan komunikime të enkriptuara.

Duke qenë se kompania refuzoi t’i përgjigjej kërkesave të autoriteteve ligjzbatuese nisën hetimet dhe u konfirmua se SKY ECC përdorte enkritim “Prety Good Privacy” dhe aplikacioni përdorej nga organizata kriminale.

Kjo solli në zbulimin e një sërë krimesh dhe korrupsionesh, siç është edhe rasti i fundit i SPAK-ut, që goditi grupin e Suel Çelës në Elbasan./ CNA