Ceremonia e Dhoksologjisë së Flamurit/ Mitropoliti i Korçës: Kemi detyrën për ta lulëzuar këtë vend

28 Nëntor 2024, 11:11, Aktualitet CNA

Ceremonia e Dhoksologjisë së Flamurit/ Mitropoliti i

Me rastin festave të Nëntorit, ashtu si çdo vit u mbajt në Katedralen e Korçës “Ngjallja” ceremonia e Dhoksologjisë së Flamurit e cila u udhëhoq nga Hirësia e Tij Mitropoliti i Korçës Hirësi Joani dhe me pjesmarrjen e të gjithë klerikëve të qytetit.

Gjatë mesazhit të tij, Mitropoliti i Korçës, Joan Pelushi theksoi se të gjithë kemi detyrën dhe përgjegjësinë për ta lulëzuar Shqipërinë.

Imzot Joan Pelushi nënvizon se atdhetar i vërtetë është ai që e lulëzon vendin e tij, jo njeri që abuzon, shpërdoron.

"Dita e sotme është një ditë kujtese. Mblidhemi çdo vit për të përkujtuar dy gjëra shumë të rëndësishme.

E para, për të falënderuar perëndinë që na ka dhënë një vend të bukur që ka gjithçka, male, fusha, kodra, lumenj, por ne jemi kujdestarët e kësaj. Ne jemi këtu për tu kujdesur për vendin. Faleminderit perëndisë por falenderimi nuk mjafton. Duhet përgjegjshmëria, kemi detyrën për ta lulëzuar këtë vend, sepse çdo njeri që mendon e thotë që "e dua perëndinë" e nuk do vendin që e ka lindur dhe rritur, ai njeri është gënjeshtar.

Është e pamundur të duash zotin e mos duash popullin tënd, familjen tënde, e të gjithë njerëzit e vendit ku ti jeton. Prandaj edhe përgjegjësia jonë është ta lulëzojmë këtë vend. Atdhetar i vërtetë është ai që e lulëzon vendin e tij, jo njeri që abuzon, shpërdoron.

E sikur të flasim gjithë ditën për atdheun, dashuria e vërtetë nuk është vetëm ndjenjë por vepër. Ata njerëz që bëjnë vepra të mira, janë ata që quhen kujdestarë të mirë dhe shpërblehen nga perëndia. Ndërsa ata që abuzojnë, quhen kujdestarët e këqinj dhe do të dënohen nga perëndia.

Prandaj, në këtë ditë të nderuar për popullin tonë, le ta kemi parasysh gjithmonë së pari falenderimin dhe së dyti përgjegjësinë që kemi për ta lulëzuar këtë vend.

Gëzuar të gjithë për shumë vjet! Lutem që perëndia ta bekojë vendin tonë dhe ta ndriçojë popullin tonë! Amin!”, deklaroi Imzot Joan Pelushi./ CNA