E fundit!

15:45 Aktualitet

46 ditë protestë/ Mbahet sot tubimi i radhës kundër qeverisë

Pasditen e sotme në Tiranë para Kryeministrisë mbahet prot...

Masat për sigurinë gjatë sezonit/ Hita: Prioritet, parandalimi i krimit

15 Korrik 2026, 14:52, Aktualitet CNA

Masat për sigurinë gjatë sezonit/ Hita: Prioritet, parandalimi i

Drejtori i Përgjithshëm i Policisë së Shtetit, Skënder Hita, ka kërkuar rritjen e angazhimit të strukturave policore për garantimin e rendit dhe sigurisë publike, veçanërisht gjatë sezonit turistik.

Ai kërkoi angazhim maksimal për parandalimin e ngjarjeve kriminale, zbardhjen në kohë të rasteve të ndodhura dhe trajtimin me përgjegjësi të çdo shqetësimi të paraqitur nga qytetarët.

Sipas tij, çdo rast duhet të ndiqet me profesionalizëm deri në përfundimin e plotë të procedurave hetimore.

Një fokus i veçantë iu kushtua rritjes së pranisë së Policisë në terren, përmirësimit të shërbimeve për sigurinë publike dhe rritjes së parametrave të sigurisë rrugore, me qëllim garantimin e një reagimi të shpejtë ndaj nevojave të qytetarëve dhe turistëve.

Hita theksoi rëndësinë e respektimit të etikës policore, integritetit dhe rritjes së performancës së çdo punonjësi të Policisë së Shtetit.

Gjatë takimit u kërkua gjithashtu intensifikimi i luftës kundër kultivimit dhe shpërndarjes së lëndëve narkotike, përfshirë kultivimin në ambiente të mbyllura dhe në terren. Sipas drejtuesit të Policisë së Shtetit, goditja e këtij fenomeni mbetet një prioritet për mbrojtjen e sigurisë publike dhe të të rinjve.

Në fokus të detyrave të reja janë edhe goditja e armëmbajtjes pa leje, kapja e personave në kërkim, lufta kundër lojërave të fatit të paligjshme, krimeve mjedisore dhe rritja e rezultateve në të gjitha fushat e veprimtarisë policore.

Sa i përket situatës së zjarreve, Hita kërkoi angazhim maksimal për parandalimin e rasteve të zjarrvënies, identifikimin dhe arrestimin e autorëve, duke nënvizuar se mbrojtja e jetës së qytetarëve, pronës dhe mjedisit është prioritet.

Në përfundim të takimit, drejtori i Përgjithshëm i Policisë së Shtetit kërkoi që drejtuesit vendorë dhe shefat e komisariateve të jenë aktivisht në krye të shërbimeve, të rrisin prezencën në zonat problematike dhe të forcojnë bashkëpunimin me institucionet e tjera ligjzbatuese për garantimin e sigurisë në të gjithë vendin./ CNA