Lejuan ndërtimet pa leje/ Dërgohen në gjyq punonjësi i policisë, kryeinspektori dhe 2 inspektorët e IMT-së në Vaun e Dejës

12 Dhjetor 2025, 10:20, Aktualitet CNA

Lejuan ndërtimet pa leje/ Dërgohen në gjyq punonjësi i

Prokuroria pranë Gjykatës së Shkallës së Parë të Juridiksionit të Përgjithshëm, Shkodër, përfundoi hetimet dhe dërgon në gjyq një punonjës të policisë të shtetit, kryeinspektorin e Inspektoratit të Mbrojtjes së Territorit (IMT) dhe dy inspektorët për veprën penale ‘Shpërdorim detyre’ dhe ‘Moskallëzim krimi’ bazuar në nenet 248 dhe 300 të Kodit Penal.

Në kuadër të hetimeve mbi procedimin penal nr.457, të vitit 2025, bazuar në materialin e referuar nga Agjencia e Mbikëqyrjes Policore, rezultoi se më datë 09.04.2025, në rrugë operative u dërguan të dhëna konkrete, se në disa raste, shtetas të ndryshëm në fshatin Pistull dhe Paçram të Njësisë Administrative Hajmel, Bashkia Vau i Dejës, po bëhen ndërtime pa leje dhe se këto shtetas janë favorizuar nga punonjësi i policisë në Komisariatin e Policisë Vau i Dejës dhe nga inspektorët e IMT-së. Në përfundim të hetimeve, rezultuan të provuara elementët e veprës penale të dyshuar dhe u morrën të pandehur, shtetasit:

-A.D., punonjës i policisë së shtetit, me detyrë ndihmësspecialist i policimit në komunitet, pranë Komisariatit të Policisë Vau-Dejës; i akuzuar për kryerjen e veprës penale në rrethanat rënduese sipas gërmës "dh", "gj", "h", neni 50 i Kodit Penal, të "Moskallëzimi i krimit" sipas nenit 300 të Kodit Penal dhe për kryerjen e veprës penale të "Shpërdorim i detyrës", sipas nenit 248 i Kodit Penal, nën masën e sigurimit personal shtrënguese "Detyrimi për t’u paraqitur në policinë gjyqësore", sipas nenit 234 të K.Pr.Penale.

-M.L., me detyrë kryeinspektor pranë IMT-sënë Bashkinë Vau i Dejës; i akuzuar për kryerjen e veprës penale në rrethanat rënduese sipas gërmës "dh", "gj", "h", neni 50 i Kodit Penal, të "Moskallëzimi i krimit" dhe “Shpërdorim i detyrës” parashikuar nga nenet 300-25 dhe 248 i Kodit Penal, nën masën sigurimit personal shtrënguese "Detyrimi për t’u paraqitur në policinë gjyqësore";

-J.H., me detyrë inspektore pranë IMT-së në Bashkinë Vau i Dejës, e akuzuar për kryerjen e veprës penale në rrethanat rënduese sipas gërmës "dh", "gj", "h", neni 50 i Kodit Penal, të "Moskallëzimi i krimit" dhe ‘Shpërdorimi i detyrës’ parashikuar nga nenet 300-25 dhe 248 i Kodit Penal, nën masën sigurimit personal shtrënguese "Detyrimi për t’u paraqitur në policinë gjyqësore";

-D.Ll., me detyrë inspektor pranë IMT-së në Bashkinë Vau i Dejës, i akuzuar për kryerjen e veprës penale në rrethanat rënduese sipas gërmës "dh", "gj", "h", neni 50 i Kodit Penal, të "Moskallëzimi i krimit" dhe ‘Shpërdorimi i detyrës’ parashikuar nga nenet 300-25 dhe 248 i Kodit Penal, nën masën sigurimit personal shtrënguese të "Detyrimi për t’u paraqitur në policinë gjyqësore"; dhe

-B.D.; i akuzuar për kryerjen e veprës penale "Veprime që pengojnë zbulimin e së vërtetës" sipas parashikimeve të nenit 301 i Kodit Penal./ CNA