web counter
LEXO PA REKLAMA!

SHKARKO APP

App Store
Google Play

Kuvendi miraton buxhetin 2026/ Kalon edhe paketa e re fiskale pas një seance maratonë

12 Dhjetor 2025, 08:50, Aktualitet CNA

Kuvendi miraton buxhetin 2026/ Kalon edhe paketa e re fiskale pas një

Kuvendi miratoi pas mesnatës së të premtes buxhetin e vitit 2026 8.8 miliardë euro me 81 vota pro dhe 16 kundër, duke mbyllur procesin e debatit për dokumentin kryesor financiar të vitit.

Në të njëjtën seancë u miratua edhe amnistia e re fiskale, përmes projektligjit “Për fshirjen, shuarjen dhe pagesën e detyrimeve tatimore ndaj administratës tatimore qendrore dhe detyrimeve të pagueshme në doganë”, i cili kaloi me 73 vota pro dhe 14 kundër.

Ligji parashikon fshirjen automatike të të gjitha detyrimeve tatimore të akumuluara deri në 31 dhjetor 2014, përveç kontributeve të sigurimeve shoqërore dhe shëndetësore. Totali i detyrimeve të prekura vlerësohet rreth 2 miliardë euro, nga të cilat 1 miliard euro janë borxhe të vjetra mbi 10 vjet që falen plotësisht.

Për detyrimet e krijuara mes viteve 2015 dhe 2020 parashikohet falje deri në 50 për qind, me kusht që pjesa tjetër të shlyhet deri në qershor 2026, ndërsa për periudhën 2020–2024 hiqen gjobat dhe kamatëvonesat nëse shlyhet principal brenda vitit 2026.

Debate dhe përplasje të forta pati edhe për projektligjin “Për marrëveshjen e paqes fiskale”, i cili u miratua me 75 vota pro mes kundërshtimeve të opozitës dhe disa deputetëve të majtë. Opozita njoftoi se do ta çojë këtë ligj në Gjykatën Kushtetuese, ndërsa pritet edhe shqyrtimi nga Presidenti.

Pjesa tjetër e paketës fiskale u votua gjithashtu me shumicë të gjerë. Ndryshimet në procedurat tatimore morën 81 vota pro, ato në ligjin për TVSH-në 80 vota pro, ndryshimet në tatimin mbi të ardhurat 84 vota pro dhe shtesat në ligjin për taksat vendore 81 vota pro.

U miratuan edhe ndryshimet në ligjin për faturën dhe monitorimin e qarkullimit, si dhe projektligji për rivlerësimin e pasurive të paluajtshme me 76 vota pro./ CNA





Lajmet e fundit nga