E fundit!

09:21 Kronika

Vrasja e policit në Maliq/ Policia: I kërkuari fshihej në stan, hapi zjarr ndaj efektivëve

Policia e Korçës ka ndarë një informacion të detajuar lidh...

Kushtetuesja zbardh vendimin (pa vendim) për Belinda Ballukun

3 Mars 2026, 12:02, Aktualitet CNA

Gjykata Kushtetuese ka zbardhur vendimin (pa vendim) lidhur me pezullimin nga detyra të zv.kryeministres dhe ministres Belinda Balluku, një çështje që nxiti një përplasje të paprecedentë kompetencash mes pushtetit ekzekutiv dhe atij gjyqësor.

Vendimi pasqyron një ndarje të thellë brenda trupës gjyqësore, ku votat e barabarta 4 me 4 sollën rrëzimin e kërkesës së Kryeministrit dhe lënien në fuqi të masës së pezullimit të dhënë nga GJKKO.

Argumentimi i gjyqtarëve u fokusua në dy qëndrime diametralisht të kundërta: Gjyqtarët që mbështetën kërkesën e Kryeministrit argumentuan se masa e pezullimit nga detyra nuk mund të shihet e shkëputur nga funksioni kushtetues i ministrit.

Sipas tyre, ashtu si deputeti, edhe ministri gëzon garanci procedurale që synojnë mbrojtjen e pushtetit ekzekutiv nga ndërhyrjet e mundshme arbitrare të drejtësisë. Ky grup gjyqtarësh vlerësoi se, duke qenë se pezullimi prek drejtpërdrejt përbërjen e qeverisë dhe besimin politik të dhënë nga Kuvendi, çdo masë që ndërpret funksionin e një ministri duhet t’i nënshtrohet autorizimit paraprak të Parlamentit. Sipas tyre, pezullimi i individit ka efekte të pashmangshme institucionale mbi mbarëvajtjen e politikave shtetërore.

Nga ana tjetër, katër gjyqtarët që votuan kundër argumentuan se imuniteti kushtetues është i kufizuar vetëm te liria personale, arresti apo kontrolli dhe nuk mbron funksionin administrativ. Ata theksuan se arkitektura e re e drejtësisë pas reformës së vitit 2016 ofron garanci të mjaftueshme që prokuroria të veprojë në mënyrë të pavarur. Sipas këtij grupi, ministri nuk është i zgjedhur direkt nga populli, ndaj nuk mund të pretendojë të njëjtën mbrojtje si deputeti ndaj pezullimit.

Ata nënvizuan se pezullimi i individit nuk e bllokon institucionin, pasi Kryeministri mund të emërojë zëvendësues, dhe se drejtësia duhet të jetë efektive pa pasur nevojë për miratimin politik të Kuvendit.

Në mungesë të një shumice prej 5 votash që kërkon ligji për të shfuqizuar një akt, kërkesa e qeverisë u konsiderua e rrëzuar. Ky rezultat i jep të drejtë Gjykatës së Posaçme të vijojë zbatimin e masave të tilla, duke e trajtuar pezullimin si një mjet ligjor të pavarur nga vullneti i Parlamentit. Vendimi mbyll betejën ligjore për këtë rast, por lë pas një debat të hapur mbi balancën mes pavarësisë së qeverisjes dhe efektivitetit të ndjekjes penale për zyrtarët e lartë./ CNA