Kush do ta përfaqësojë Bashkinë e Tiranës në dëgjesë?/ Mazniku: Çështje e institucionit si e siguron prezencën

25 Qershor 2026, 14:26, Aktualitet CNA

Kush do ta përfaqësojë Bashkinë e Tiranës në

Bashkëkryetari i Komisionit për Reformën Territoriale, Arbjan Mazniku, ka bërë të qartë se afati i punës së komisionit përfundon më 15 korrik dhe se deri atëherë do të paraqitet në Kuvend një raport me përfundimet dhe rekomandimet e ekspertëve.

Në një intervistë në "A2CNN", Mazniku tha se komisioni nuk parashikon të kërkojë zgjatje të mandatit, pasi koha në dispozicion është e kufizuar për shkak të procesit zgjedhor të vitit 2027.

Ai shtoi se mbetet synim arritja e një dakordësie me opozitën për një qëndrim të përbashkët mbi reformën.

Duke komentuar çështjen e pjesëmarrjes së përfaqësuesve vendorë në dëgjesat e komisionit, Mazniku u ndal te rasti i Bashkisë së Tiranës. Ai theksoi se ftesat janë dërguar për të gjithë 61 kryetarët e bashkive dhe se komisioni ka kërkuar që në seanca të marrin pjesë vetë drejtuesit e zgjedhur të pushtetit vendor.

Sipas tij, përgjegjësia për të garantuar praninë në dëgjesë i takon institucionit përkatës.

“Më 15 korrik mbaron afati që Parlamenti i ka dhënë komisionit. Ne duhet të shkojmë më 15 korrik, me një produkt, që mund të jetë një raport me gjetjet tona, punën e ekspertëve. Nëse e kemi të pjekur situatën për t’i ofruar Parlamentit një zgjidhje, do t’i ofrojmë një zgjidhje. Nuk kemi si t’i kërkojmë kohë Kuvendit, pasi në 2027 do të kemi zgjedhje. Kemi tri opsione: Të shkojmë me një propozim të përbashkët. Por më e rëndësishmja kjo është një çështje që e vendos Kuvendi. Do të tregojmë vullnet për një marrëveshje me opozitën. Ne kemi kërkuar që kryetarët e bashkive të Shqipërisë, të 61 kryetarët e bashkive, të jenë prezentë dhe të vijnë të dëgjohen. Ne kemi çuar tashmë kërkesat për çdo institucion. Dhe është e vërtetë, ne kemi mbajtur një standard që të dëgjohen kryetarët e bashkive, ata që janë të zgjedhur për detyrën. Është çështje e institucionit më pas se si e siguron prezencën në komision. Është e vërtetë që në të gjitha rastet prezent të jetë kryetari i bashkisë”, ka thënë Mazniku./ CNA