Kriza me çmimet e naftës/ Berisha: Bota merr masa, Rama u heq fermerëve subvencionet

14 Prill 2026, 15:43, Aktualitet CNA

Kriza me çmimet e naftës/ Berisha: Bota merr masa, Rama u heq

Kreu i Partisë Demokratike, Sali Berisha, deklaroi se protesta e 17 prillit pritet të jetë një “revoltë e fuqishme qytetare” kundër korrupsionit dhe situatës ekonomike në vend.

Në një deklaratë për mediat, Berisha kritikoi ashpër qeverinë e drejtuar nga Edi Rama, duke e akuzuar për politika të gabuara në lidhje me çmimet e naftës dhe mbështetjen ndaj fermerëve.

Sipas tij, ndryshe nga vendet e Bashkimit Europian, të cilat kanë ndërmarrë masa për të lehtësuar barrën fiskale mbi karburantet dhe për të mbështetur bujqësinë, Shqipëria po ndjek një kurs të kundërt.

Ai theksoi se shumë vende perëndimore kanë ulur taksat mbi naftën dhe kanë rritur subvencionet për fermerët për të përballuar rritjen e çmimeve.

Berisha u shpreh se qeveria shqiptare nuk ka ndërmarrë hapa për uljen e çmimit të karburanteve, ndërsa, sipas tij, po përfiton nga rritja e TVSH-së.

Ai shtoi gjithashtu se heqja e subvencioneve për fermerët rrezikon seriozisht sektorin bujqësor në vend.

Në përfundim, ai u bëri thirrje qytetarëve që t’i bashkohen protestës së 17 prillit, duke e cilësuar atë si një reagim të domosdoshëm ndaj situatës aktuale ekonomike dhe politike.

“Ju e dëgjuat. Cilat janë zhvillimet sot në Europë në raport me naftën? Nafta është gjaku i ekonomisë dhe është materia me ndikim më të fuqishëm jo vetëm në industri, jo vetëm në ata që kanë makina, por dhe të gjithë ata që ushqehen, të gjithë ata që blejnë në dyqane, të gjithë ata që ecin, që përdorin transportin, që lëvizin.

E gjithë Evropa, e gjithë bota perëndimore, Australia, janë angazhuar në lehtësime të menjëhershme të barrës fiskale mbi naftën. Në një kohë kur Edi Rama po nxjerr fitime përrallore për shkak të rritjes së TVSH-së dhe nuk ul asgjë, derisa nafta thotë të kalojë 224 lekë për litër. Përveç kësaj, ai mori një vendim absolutisht me synim falimentimin e fermerëve shqiptarë.

Më lejoni t'i informoj fermerët e vendit, se Gjermania në një akt para tre ditësh, vendosi të dyfishojë subvencionin e naftës për fermerët. Ta dyfishojë. Të tjerat po kështu, Suedia. Dhe vende të tjera, Suedia uli TVSH-në e ushqimeve në 6%, nga 12% që e kishte. Për shkak të këtyre çmimeve.

Kurse Edi Rama hoqi subvencionimin për fermerë shqiptarë dhe shkoi në paturpësinë, pacipësinë më të madhe. U deklaroi 2 metra gënjeshtar, u deklaroi se Evropa nuk e përdor më subvencionin.

Edhe njëherë u them fermerëve shqiptarë se nuk ka asnjë vend në, në vendet anëtare të Bashkimit Evropian apo që negociojnë, të cilat nuk japin subvencion për naftën për fermerët", tha Berisha./ CNA