web counter
LEXO PA REKLAMA!

SHKARKO APP

App Store
Google Play

E fundit!

x

Denoncimi i Këlliçit: Skandali i lidhur me Ramën kërcënon pozicionin e Shqipërisë në NATO

14 Prill 2026, 13:23, Aktualitet CNA

Denoncimi i Këlliçit: Skandali i lidhur me Ramën

Deputeti i Partisë Demokratike, Belind Këlliçi, përmes një postimi në rrjetet sociale, ka denoncuar një aferë që, sipas tij, lidhet me kryeministrin Edi Rama.

Këlliçi shkruan se skandali lidhet me një biznesmen izraelit me nënshtetësi shqiptare, Ron Yeffet, kompania e të cilit është përfshirë në akuza ndërkombëtare për mashtrim.

Padia ndaj Yeffet për mashtrim në shumën e 7.6 milionë dollarëve, sipas deputetit, është dorëzuar në gjykatën e Floridës, nga një biznesmen amerikan në fushën e energjisë. Këlliçi shprehet se, sipas padisë, Ron Yeffet ka përdorur lidhjet e forta me kryeministrin Rama, “duke i siguruar takime me të dhe zyrtarë të tjerë për ta mashtruar në lidhje me mundësi investimesh”.

Sipas deputetit demokrat, kjo ekspozon një skandal të mundshëm me pasoja edhe për vetë NATO-n, ku anëtare është dhe Shqipëria. Në reagimin e tij, Këlliçi i ka drejtuar disa pyetje kryeministrit Edi Rama, lidhur me çështjen.

Postimi i plotë:

Edi Rama nuk di të ndalet në rrezikimin e sigurisë kombëtare, por kësaj here hijet e skandalit kërcënojë pozicionin e Shqipërisë në NATO si dhe vetë sigurinë e Aleancës Veri-Atlantike.

Pas aferës me Charles McGonigal, alarmi është ndezur sërish rreth një tjetër skandali me një tjetër emër, lidhje e ngushtë e kryeministrit Edi Rama. Bëhet fjalë për biznesmenin kontrovers izraelit me nënshtësi shqiptare Ron Yeffet, kompania e të cilit R&I Trading është përfshirë zyrtarisht në akuza serioze ndërkombëtare për mashtrim.

Ron Yeffet, sa për kujtesë, ka hyrë fuqishëm në industrinë e armëve në Shqipëri përmes dy kompanive në ortakëri me shoqërinë shtetërore KAYO, për prodhim dhe eksport armësh, ku në shkelje të rënda, pa garë e transparencë ka marrë mbi 10 milionë euro paradhënie nga shteti shqiptar.

Vetëm pak ditë më parë një dokument zyrtar, dorëzuar në gjykatën e Floridas, dëshmoi padinë e një biznesmeni amerikan në fushën e energjisë, Mark Faist, ndaj biznesmenit Ron Yeffet për mashtrim në shumën e 7.6 milionë dollarëve. Sipas padisë Ron Yeffet, ka përdorur lidhjet e tij të forta me Kryeministrin Edi Rama, duke i siguruar madje takime me të dhe zyrtarë të tjerë për ta mashtruar në lidhje me mundësi investimesh.

Mirëpo “ndërmjetësi” dhe miku i Ramës ka marrë “carta bianca” për të vepruar lirshëm në një vend, që sado i vogël e kalbur në korrupsion, është gjithsesi anëtar i NATO-s. Dhe ky rol po ekspozon sot kreun e qeverisë shqiptare në një skandal të mundshëm me pasoja edhe për vetë Aleancën.

Më 12 Janar 2024, një njoftim zyrtar i kompanisë SMX (Security Matters) Public Limited Company, kompani teknologjike izraelite me bazë në Irlandë, kuotuar në bursat ndërkombëtare, e specializuar në verifikimin, sigurinë, origjinën dhe gjurmimin e produkteve do të njoftonte për një kontratë prej 5 milionë dollarësh me R&I Trading të Ron Yeffet në lidhje me një shtet anëtar të NATO-s, duke synuar zgjerimin edhe në vende të tjera të Aleancës.

Pra një ndërmjetës i Edi Ramës, emri i të cilit endet nëpër akuza për mashtrim dhe lidhje që përdoren si kapital besimi për viktimat e tij, rezulton në një tjetër kontratë në një “vend anëtar të NATO-s”.

Disa pyetje në interes të publikut, sigurisë së tij, po ia drejtoj që sot, si i mandatuar prej vullnetit të shqiptarëve, Edi Ramës:

1. A është Shqipëria ky vend “anëtar i NATO-s” në kontratën e pa specifikuar mes SMX dhe kompanisë së mashtruesit Ron Yeffet?

2. Në rast se është Shqipëria, me cilën procedurë ligjore konkuruese u përzgjodh kompania e Ron Yeffet për të bërë ndërmjetësimin për vendin tonë në një kontratë me “anëtarin e NATO-s”?

3. A po rrezikon kreu i qeverisë sigurinë kombëtare dhe atë të partnerëve në Aleancë, duke lënë në dorë të një të akuzuari për mashtrim industrinë e armëve të Shqipërisë?

4. A rrezikon anëtarësimin në NATO Shqipëria me këto manovra korruptive, pas bllokimit të procesit të integrimit prej çështjes Balluku?

Edi Rama ka zëvendësuar shtetin me rrethin e tij prej kriminelësh e mashtruesish edhe ndërkombëtarë, por pikërisht ky neps i shfrenuar iluzionesh prej lideri “global” po ia ha kokën. /CNA





Lajmet e fundit nga