Investimi për parkun eolik të Tropojës/ Rama: Shqipëria do të bëhet një vend sovran në prodhimin e energjisë

12 Janar 2026, 11:29, Aktualitet CNA

Investimi për parkun eolik të Tropojës/ Rama: Shqipëria do

Kryeministri Edi Rama njoftoi sot se investimi i ri për parkun e energjisë së erës në Tropojë do të jetë një hap strategjik për diversifikimin e burimeve energjetike dhe për të bërë Shqipërinë një vend sovran në prodhimin e energjisë.

Ai shtoi se, historikisht, vendi ka qenë i varur nga reshjet e shiut, duke blerë energji në periudha të thatësirës dhe duke humbur mundësitë e prodhimit gjatë periudhave me prurje të shumta.

Kryeministri theksoi se projekti është pjesë e një portofoli që diversifikon energjinë e diellit, erës dhe ujit, duke synuar që deri në fund të dekadës të arrihet një bilanc ku 30% e prodhimit do të vijë nga burimet e rinovueshme dhe çdo energji e tepërt do të eksportohet jashtë vendit.

Ai vlerësoi gjithashtu procesin e transparencës në zgjedhjen e projekteve, duke theksuar se nuk ka pasur ankesa nga kompanitë pjesëmarrëse dhe se qeveria ka mbështetur investitorët për të kapërcyer pengesat lokale.

“Ky park i energjisë së erës në Tropojë do të hyjë në projektet e energjisë së erës në vend. Ka marrë shembull në disa vende përpara se të mbërrinte në Shqipëri dhe ne do të përfitojmë energji të rinovueshme dhe dije të reja në sektorin energjetik.

Ky investim shkon në drejtimin strategjik për ta bërë Shqipërinë një vend sovran në prodhimin e energjisë.

Kemi trashëguar një sistem me shumë të çara nga varësia e shiut. Në mungesë të reshjeve kemi qenë të detyruar të blejmë energji, ndërsa në periudhat me prurje të shumta kemi derdhur ujë dhe nuk kemi pasur kapacitete për prodhim energjie.

Ne do të jemi në kategorinë e atyre vendeve që kanë diversifikuar burimet e energjisë.

Sot, ato që deri dje ishin plagë të shtetit shqiptar, janë pararojë në administrimin dhe në mirëfunksionimin e tyre. Sot kemi një portofol projektesh që ka nisur të zhvillohet, ku energjia e diellit dhe ajo e erës kanë filluar të zënë vendin e tyre dhe ku, në fund të kësaj dekade, bilanci energjetik do të jetë 30%. Kjo do të thotë që çdo tepricë mbi nevojat tona do ta eksportojmë jashtë vendit.

Ne kemi realizuar një proces me besueshmëri të lartë. Nuk ka asnjë kompani serioze në këto gara që të ketë shprehur pakënaqësi për sa i përket procesit të përzgjedhjes së projekteve. Qeveria ka qenë në krah të tyre edhe kur kanë pasur pengesa në nivel vendor”, u shpreh Rama./ CNA