Inteligjenca Artificiale u aplikua në numërimin e votave në Tepelenë/ Celibashi: Testimi ishte i suksesshëm

10 Nëntor 2025, 15:43, Aktualitet CNA

Inteligjenca Artificiale u aplikua në numërimin e votave në

Në zgjedhjet e mbajtura një ditë më parë për kryetar bashkie në Tepelenë, Komisioni Qendror i Zgjedhjeve ka aplikuar edhe Inteligjencën Artificiale në numërimin dhe vlerësimin e fletëve të votimit dhe nxjerrjen e rezultatit.

Në një deklaratë, kreu i KQZ-së, Ilirjan Celibashi, njofton se testimi i Inteligjencës Artificiale u bë që të shihej sa i dobishëm mund të jetë në të ardhmen përdorimi i kësaj risie në procesin zgjedhor.

KQZ njofton se testimi rezultoi i suksesshëm dhe përmbushi të gjitha pritshmëritë. Gjithashtu bëhet me dije se leximi dhe më pas numërimi e vlerësimi i fletëve të votimit, prodhoi pothuajse 100% të njëjtin rezultat me atë që doli nga numërimi fizik i fletëve të votimit.

DEKLARATA E PLOTË:

Numërimi i fletëve të votimit për zgjedhjet për kryetar të Bashkisë Tepelenë u krye edhe nëpërmjet Inteligjencës Artificiale.

Kjo mënyrë e numërimit të fletëve të votimit nuk kishte për qëllim të zëvendësonte mënyrën manuale/fizike të numërimit të cilën e përcakton Kodi Zgjedhor. Por nisur nga gjetjet dhe rekomandimet e Misionit të Vëzhgimit të Zgjedhjeve 2025 të OSBE/ODIHR, KQZ duhet medoemos të rrisë rolin mbikqyrës gjatë funksionimit të grupeve të numërimit të votave, për të shmangur tabulimet e gabuara dhe rrjedhjen e votave nga një subjekt zgjedhor tek tjetri.

Përdorimi i Inteligjencës Artificiale ishte një test teknik, nëpërmjet të cilit ne, si Komision Qendror i Zgjedhjeve, dëshironim të shihnim se sa, e dobishme mund të jetë në të ardhmen përdorimi i kësaj risie në procesin zgjedhor, — në lidhje me saktësinë e numërimit dhe vlerësimit të fletëve të votimit, transparencën e këtij procesi, efikasitetin kohor, kosotot, dhe, në fund të fundit, me integritetin e tij.

Më së paku, përdorimin e Inteligjencës Artificiale në numërimin dhe vlerësimin e fletëve të votimit e kemi parë si një mjet të përshtatshëm për kontrollin e profesionalizmit dhe ndershmërisë së numëruesve dhe komisionerëve zgjedhorë.

Testi i kryer ishte i suksesshëm dhe përmbushi të gjitha pritshmëritë tona.
Leximi, dhe më pas numërimi e vlerësimi i fletëve të votimit, u krye me sukses të plotë duke përdorur Inteligjencën Artificiale.

Pamjet filmike të përftuara gjatë numërimit dhe vlerësimit me dorë të fletëve të votimit u lexuan dhe u analizuan në kohë reale nga programi kompjuterik që bazohet në Inteligjencë Artificiale.

Në përgjithësi, leximi dhe analiza e këtyre pamjeve prodhoi pothuajse 100% të njëjtin rezultat me atë që doli nga numërimi fizik i fletëve të votimit.

Pamjet e faqes ballore të fletës së votimit – asaj që përmban emrat e kandidatëve – u lexuan me saktësi të plotë nga moduli i numërimit të automatizuar, pra sistemi i Inteligjencës Artificiale.

U konstatuan disa pasaktësi në leximin e faqes së pasme të fletës së votimit, faqes ku ndodhen vendet e vulosjes së saj.

Në të ardhmen, arritja e saktësisë 100% në numërimin dhe vlerësimin e fletëve të votimit nëpërmjet përdorimit të Inteligjencës Artificiale do të varet nga ndërtimi i disa protokolleve teknike, të cilat duhet të respektohen nga komisionerët dhe numëruesit gjatë kryerjes së procedurave të numërimit dhe vlerësimit të fletëve të votimit.

Gjithashtu, më së pari do të duhet të bëhen ndryshime në Kodin Zgjedhor, në mënyrë që rezultatet e prodhuara nëpërmjet përdorimit të kësaj teknologjie të konsiderohen ligjërisht zyrtare. /CNA