web counter
LEXO PA REKLAMA!

SHKARKO APP

App Store
Google Play

E fundit!

x

Mbi skandalin e Gjykatës së Lartë

10 Nëntor 2025, 11:58, Aktualitet REDAKSIONALE


"Top Channel" publikoi dje një lajm, në të cilin theksohej se Gjykata e Lartë ishte e përfshirë në një skandal. Një dokument i papublikuar për gjyqtarin Asim Vokshi, i zgjedhur nga KED si anëtar i Gjykatës Kushtetuese, rrodhi si akuzë në media. Bazuar në raportim, ky dokument ishte mbajtur sekret, i ishte fshehur trupës së gjyqtarëve dhe në KED nuk ishte trajtuar në formën e duhur.

Si qëndron e vërteta?

Janë dy kandidatë në garë: Naureda Llagami dhe Asim Vokshi. Gjykata e Lartë zgjodhi këtë të dytin.

A duhet të shkojë njëri apo tjetri në Kushtetuese, ne si redaksi e CNA-së nuk na intereson fare, për të mos thënë një fjalë edhe më të rëndë.

Për të parë të vërtetën në sy, thelbi është një.

Çfarë ka ndodhur realisht në Gjykatën e Lartë për të zgjedhur anëtarin e Gjykatës Kushtetuese?

A ka pasur ndërhyrje nga të mbarë e të prapë?

Si qëndron e vërteta?

A ekziston një dokument?

Në rast se ekziston dhe është sjellë nga organet ligjzbatuese në një formë të dyshimtë, apo ky institucion ligjzbatues është keqpërdorur nga individë të caktuar, për të çuar situatën në këtë gjendje, atëherë kjo vlen edhe më shumë për t'u hetuar.

Kush duhet të zgjidhet anëtar i Gjykatës Kushtetuese?

Për ne si redaksi nuk ka rëndësi. Rëndësi ka procedura që është ndjekur.

Sokol Sadushi mund ta ketë ndjekur procedurën rregullisht, por aty ekziston një dokument, sepse edhe vetë KED-i e pranon midis rreshtash.

Askush nuk ka asgjë me gjyqtarin Asim Vokshi. Të shkojë në Gjykatë Kushtetuese sipas praktikave të rregullta ligjore pa e penguar askush. Në rast se dikush tjetër, me apo pa dashje, ka krijuar intriga dhe situata me dokumente dhe informacione të rreme për ta goditur, kjo duhet hetuar deri në fund. Dhe këtë duhet ta bëjë SPAK-u për ta zbardhur situatën.

Në rast se Sokol Sadushi është sjellë sipas rregullave me procedurën, të ngelet i nderuar dhe i respektuar si kryetar i Gjykatës së Lartë. Por në rast se dokumenti është i rregullt, ekziston, dhe janë kryer manipulime apo shmangie për të mos ulur pikët e një kandidati të caktuar, kjo flet jo pak.

Thelbi i së gjithës është e vërteta. Dhe e vërteta fillon e mbaron te një procedurë transparente, jo te sqarimet me ‘cirqe’ fjalësh, të cilat nuk thonë gjë në fund, por thjesht dhe vetëm vazhdojnë e rrisin dyshimet.

Për ne, si CNA, nuk ka rëndësi nëse shkon Asim Vokshi apo Naureda Llagami. Për ne ka rëndësi: ekzistenca e dokumentit dhe pse nuk është trajtuar si duhet?

Në rast se ky dokument ka skenarë të tjerë nga pas, të hetohen skenarët dhe të dalë e vërteta deri në fund. E në rast se Sokol Sadushi ka shkelur ligjin, ai duhet të japë dorëheqje nga detyra si kryetar i Gjykatës së Lartë. E në të kundërt, në rast se ai vërtet paska qenë kaq transparent dhe etik, t'i hiqet kapelja.

Por me sa duket, kjo e fundit është me vrima./CNA





Lajmet e fundit nga