E fundit!

14:05 Politikë

Zhupa-mazhorancës: Rrëzimi i shfuqizimit të ligjit 21/2024 iu duhet për të realizuar projektet turistike

Deputetja demokrate, Ina Zhupa, hodhi sot akuza në drejtim...

Harta e re gjyqësore/ Avokatët, bojkot seancave për tri ditë

12 Qershor 2022, 11:42, Aktualitet CNA

Harta e re gjyqësore

Komiteti Drejtues i Dhomës së Avokatisë të Shqipërisë, pasi u njoh, mori në shqyrtim vendimin e Këshillit të Lartë Gjyqësor dt.10.06.22, me anën e të cilit është miratuar harta e re gjyqësore, ka dalë me një reagim.

Sipas Komitetit Drejtues, vendimi për miratimin e hartës së re gjyqësore është në shkelje të rëndë të të drejtave dhe lirive themelore të individit, të mbrojtura posaçërisht nga Kushtetuta.

“Ky vendim cenon dhe kufizon rëndë aksesin në drejtësi të individit, si dhe procesin e realizimit të mbrojtjes në çështjet penale, civile dhe administrative.

Me keqardhje konstatojmë se ky vendim është në përputhshmëri dhe në përkrahje me një sërë shkeljesh të konstatuara në proceset penale, civile e administrative të zhvilluara në gjykatat e të gjitha niveleve.

Me këtë vendim u injoruan haptazi gjithë problematikat dhe argumentet e parashtruara nga ana e Organeve drejtuese të Dhomës Qendrore dhe atyre vendore gjate procesit të diskutimit te draftit në shkallë vendi, fakt i cili tregoi qartë formalitetin, paragjykimin dhe abuzivitetin në mosmarrjen në konsideratë të mendimit të grupeve të interesit, përfshi Dhomën e Avokatisë të Shqipërisë si një nga aktorët kryesor në procesin e dhënies së drejtësisë", thuhet në reagim.

Në këtë situatë Komiteti Drejtues ka dalë me një vendim për bojkotim të seancave gjyqësore.

“Të bojkotoj të gjitha proceset gjyqësore, me përjashtim të masave të sigurimit, të planifikuara për gjykim, në të gjitha nivelet e gjykatave përfshirë edhe proceset e planifikuara në Gjykatën e Lartë nga data 14 deri në datën 17 qershor.

Moszbatimi i këtij vendimi nga ana e avokatëve përbën shkelje të rëndë të kuadrit ligjor mbi profesionin e avokatit, e për rrjedhojë do të procedohen disiplinarisht", thuhet në reagimin e Dhomës së Avokatisë të Shqipërisë.

Kujtojmë se propozimi i KLGJ-së ishte 13 gjykata të shkallës së parë, 2 gjykata administrative dhe 1 gjykatë apeli për të gjithë vendin.

Me vendimin e ri shkrihen gjykatat në Tropojë, Krujë, Lushnje, Pogradec, Krujë, Mat, Përmet, Kurbin, Kavajë, Pukë.

KLGJ ka miratuar draftin, që pritet të kalojë për mendim në Këshillin e Ministrave, Këshillin e Lartë të Prokurorisë, Prokurorisë së Përgjithshme dhe Ministrisë së Financave./CNA.al