Gënjeshtra me autostradën 1.3 miliardë euro

11 Qershor 2022, 18:01, Aktualitet CNA

Gënjeshtra me autostradën 1.3 miliardë euro

Projekti për autostradën Thumanë - Kashar

Një 'fakenews' që qarkullon pa ndalim në media. Propagandë politike, gjobë ndaj biznesit apo çfarë?

Raportohet se BE-ja do të financojë 123 kilometra autostradë për 1.2 miliardë euro. Nga ana tjetër, 21 km rrugë në Shqipëri do të kushtojnë 1.3 miliardë euro. Bëhet fjalë për Thumanë - Kashar me gjatësi 21 kilometra me një vlerë totale që parashikon edhe mirëmbajtjen 36 vite, me rreth 1.3 miliardë euro total qarkullim të ardhurash në këtë periudhë kohore.

Sipas të dhënave që raportohen, janë disa investime në Ballkan nga BE-ja, duke filluar nga Bosnja e deri në Tiranë.

Por po ta shohësh dhe thellohesh te krahasimi kemi të bëjmë me një 'fakenews', në shërbim të një propagande politike apo gjobëvënie në media.

Së pari, gjatësia e autostradave që do të financohen nga BE në Ballkan është gjithsej 123 kilometër, ndërsa kostoja totale e ndërtimit është 1,2 miliardë euro ose rreth 10 milionë euro për kilometër.

Një nga këto segmente është në Shqipëri pjesë e “Autostradës Adriatiko Joniane”. Bëhet fjalë për By pass-in e Tiranës i cili ka një gjatësi 21.5 kilometër dhe do të financohet me 190.6 milionë euro ose mesatarisht 8.9 milionë euro për kilometër.

Në asnjë rast nuk saktësohet gjerësia e autostradës, si dhe nuk përllogariten kostot shtesë të qeverisë shqiptare, interesat e kredisë, koha e shlyerjes, shmangia e taksave etj. Në asnjë fjali nuk thuhet sa kushton mirëmbajtja për 36 vite, askush nuk thekson sa kushtojnë shpronësimet. I kanë harruar në llogari apo diku tjetër e kanë hallin.

Ndërtimi i rrugës Thumanë - Kashar, së bashku me dy akset rrugore paralele, pra segmentet rrugore dytësore, do të kushtojnë si kosto ndërtimi në të njëjtën vlerë diku edhe më lirë se investimi i BE-së.

Së pari, rruga nuk është 20 kilometër, por 21, krahasimi totalisht i gabuar se nuk mund të vihen në peshë një autostradë me 6 korsi, që ka brenda investimit mirëmbajtjen për 36 vite, por edhe ndërtimin e disa dhjetëra rrugëve dytësore, për të pasur një segment falas paralel.

Në total nuk është një ndërtim 20 kilometër, por më shumë se dyfishi apo trefishi në gjatësi. Vetëm pjesa Thumanë – Kashar, si autostradë është 20 kilometër, janë disa dhjetëra kilometra rrugë të tjera dytësore, pa lënë mënjanë shpronësimët, veprat e artit, etj.

Për ata që kuptojnë 1.3 miliardë euro është investimi dhe mirëmbajtja për 36 vite, jo vetëm ndërtimi i 21 kilometrave. Qeveria shqiptare aktualisht për mirëmbajtjen e rrugëve paguan 90 milionë euro në vit. Llogari mjaft e thjeshtë. 36 vite i shumëzojmë me 90.000.000 milionë euro dhe vlera del 3,240,000,000, vetëm mirëmbajtje, asnjë centimetër rrugë e ndërtuar.

Mirëmbajta e rrugëve në Shqipëri është një tjetër gropë në buxhetin e shtetit, e cila shkon 90 milionë euro në vit. Në rastin e Thumanë – Kashar çdo krahasim i bërë me investimin e BE është një gënjeshtër, sepse kurrsesi nuk mund të vihen në një peshore, në çdo rast Thumanë - Kashar do t'i kushtojë më lirë qeverisë shqiptare sesa rrugët e financuara nga BE-ja. E vërteta është se qeveria e anuloi koncesionin, por gjithçka u zgjidh gjyqësisht, për të shmangur arbitrazhin ku dëmi mund të ishte 10 herë më i madh se investimi./ CNA.al