Gjykata Themelore “rrëzon” Prokurorinë Speciale/ Hedh poshtë aktakuzën ndaj Klodian Allajbeut

30 Qershor 2025, 12:42, Aktualitet CNA

Gjykata Themelore “rrëzon” Prokurorinë Speciale/ Hedh

Gjykata Themelore e Prishtinës ka rrëzuar aktakuzën e Prokurorisë Speciale për pronarin e Spitalit Amerikan, Klodian Allajbeu dhe pronarit të Qendrës Kardiake të Kosovës, Ekrem Lluka, për falsifikim dokumentesh dhe pastrim parash.

Sipas Gjykatës Themelore, në aktakuzën e ngritur ndaj tyre nuk ka prova të mjaftueshme që veprat penale të jenë kryer nga të pandehurit.

“Dokumentet e konsideruara si të falsifikuara janë nënshkruar nga persona të autorizuar dhe nuk ka nderhyrje që do të plotësonin elementet e vepres penale të falsifikimit sipas nenit 390 të KPRK. Vepra e shpërlarjes së parave nuk mund të ekzistojë pa një vepër paraprake penale të provuar. Prokuroria ka aplikuar gabimisht Kodin Penal të vitit 2019 për vepra të pretenduara të kryera në vitet 2014-2015, kur ka qenë në fuqi Kodi Penal i vitit 2012, i cili ka dispozita më të favorshme”, thuhet në vendimin e Gjykatës.

Gjykata ka theksuar se vendimi për pushimin e procedurës penale u mor për shkak të mungesës së provave.

“Vepra penale ekziston dhe në situatën ku personi i shënuar në dokument nuk ekziston fare apo ka vdekur. Përpilimi i rremë ekziston edhe atëherë kur është përpiluar pjesërisht dokumenti i rremë – në dokumentin ekzistues origjinal (të vërtetë) një pjesë fshihet, i jepet përmbajtje tjetër, i shtohet emri edhe i ndonjë personi, përpos dhënësit të dokumentit, apo shlyhet emri i ndonjë personi që është lëshues (dhënës) i dokumentit etj”.

Gjykata më tej konstaton se nuk kemi të bëjmë me falsifikim dokumenti edhe në ato situata kur dokumenti është nënshkruar nga personi i autorizuar (nënshkrimi është autentik – origjinal), por përmbajtja e tij është e pavërtetë ose e pavlefshme.

Sa u përket akuzave për veprën pastrim i parave, Gjykata konstaton se Prokuroria nuk e ka arsyetuar me argumente këtë pretendim.

“Meqenëse bëhet fjalë për kompanitë fitim prurëse, të cilat kanë të hyra të ndryshme vjetore nga veprimtaria e tyre (pra, nuk kanë pasur si burim të vetëm paratë e supozuara të paligjshme), lindë pyetja që kërkon sqarim: me cilat prova prokuroria ka vërtetuar se pikërisht me ato para të paligjshme janë blerë prona imagjinare), dhe jo me paratë e ligjshme në kuadër të biznesit të tyre? Këtë përgjigje nuk e ka dhënë prokurori, nuk ka argumentuar, e që ky pretendim ngelet vetëm nën suaza të 'supozimeve-hamendësimeve', por jo pretendim i argumetuar me prova të pakontestueshme”, thuhet në vendimin e Gjykatës Themelore.

Gjykata Themelore e Prishtinës nënvizon se Prokuroria nuk përmend asnjë provë konkrete, asnjë xhirollogari konkrete, asnjë transfertë konkrete të realizuar me paratë e supozuara të pista, duke mos i identifikuar se ku ndodhen, pa dhënë asnjë argument të vetëm se me cilat prova ka vërtetuar prokuroria se pikërisht këto prona, transferta parash apo xhirollogari janë produkt i veprës penale të falsifikimit të dokumenteve.

“Shitblerjet janë të ligjshme vetëm kur kryhen me trasanksione bankare, dhe transferi i parave kontrollohet me rigorozitet nga mekanizmat mbikëqyrës të bankave. Po të mos i kishin arsyetuar ato para me dëshmi të ligjshme, nuk do të mund të realizonin transfere të tilla dhe nuk rezulton se së paku te ndonjëri nga këto veprime që prokurori po i vlerëson si vepra penale të jenë ndëshkuar së paku me gjoba administrative”, thuhet në vendimin e Gjykatës Themelore të Prishtinës./ CNA