Djegia e Kuranit në Suedi/ Ish-Myftiu i Tiranës: U tejkalua çdo kufi, vepër e papranueshme

1 Korrik 2023, 17:51, Aktualitet CNA

Djegia e Kuranit në Suedi/ Ish-Myftiu i Tiranës: U tejkalua çdo

Ish-Myftiu i Tiranës, Ylli Gurra

Ish-Myftiu i Tiranës, Ylli Gurra në një intervistë televizive ka folur për djegien e Kuranit disa ditë më parë.

Ai tha se djegia e Kuranit është një vepër e papranueshme dhe e dënueshme jo vetëm nga pikëpamja fetare, por edhe nga ana qytetare.

“Pavarësisht pikëpamjeve, preferencave, shtysat e personit apo personave në vendet që ato ndodhin në raport me librat hyjnorë si Kurani apo Bibla, apo nëse shkojmë më larg te Teurati, libri i hebrenjve, janë shenjtëri e një grupi të madh komuniteti besimtarësh. Është një ndjeshmëri që i kalon kufinjtë nacionalë të një vendi. Është përtej logjikës qoftë fetare dhe qytetare”, u shpreh ai.

Më tej, ish-Myftiu shtoi se Librat Hyjnorë e kanë këtë shenjtëri dhe gjejnë këtë zbatueshmëri duke filluar nga miliarda qytetarë të botës, të cilët kanë vendosur të zgjedhin qoftë islamin, krishtërimin, judaizmin apo hebraizmin.

“Duhet të jemi të drejtëpërdrejtë dhe të sinqertë në atë që ne themi. Një pjesë e këtyre vijnë nga gabimet e vetë pjesëtarëve të besimit. Por në rastin e personit në Suedi, kjo tejkalon çdo kufi dhe aq më tepër në Festën e Kurban Bajramit, veprim që godet më shumë. Autoritet Suedeze kanë disa limite apo caqe të tjera të lirive dhe të të drejtave të njeriut. Lejimi dhe mbrojtja e qytetarit irakien, për të cilin nuk e di nëse ka fituar azilin politik është e gabuar”, deklaroi Ylli Gurra.

Përsa i përket personit që dogji Kuranin, ai deklaroi se bën pjesë në kategorinë e njerëzve që janë stereotipe të prodhuar nga koha që gjejnë shumë pak të drejtë nga realitetet e tyre kombëtar.

“Ndihen të shtypur jo vetëm në raport me fenë, por edhe në lirinë e fjalës, mendimit, lirisë ekonomike, lirisë së lëvizjes. Vijnë nga vende që kanë përjetuar ndoshta për disa dekada një lloj diktature dhe gjejnë rastin më të parë që të mund të shprehin të gjithë lirinë dhe të drejtat që mund t’i lindin”, theksoi ish-Myftiu./ CNA.al