Debati me gjyqtarët/ Gjikondi: Rama po konsumon konflikt articial, fushatë kundër drejtësisë

11 Shkurt 2026, 19:31, Aktualitet CNA

Një debat publik ka ndodhur mes kryeministrit Edi Rama dhe Shoqatës së Gjyqtarëve, ku kjo e fundit kërkon rritje pagash ndërsa kryeministri e kundërshton kërkesën e tyre.

Për këtë përplasje ka reaguar juristja Brizida Gjikondi për CNA.

Sipas Gjikondit kërkesa e gjyqtarëve është një kërkesë ligjore e orientuar drejt indeksimit të pagave siç dhe ligji e parashikon.

Sa i përket qëndrimit të Ramës, Gjikondi thotë se po konsumon një konflikt artificial që më shumë ka të bëjë me uljen e autoritetit të gjyqtarëve dhe lincimin e tyre nga shqiptarët, gjë që sipas juristes do i vlejë Ramës kur kjo drejtësi të ketë të bëjë me të personalisht.

“Mendoj se është një kërkesë ligjore e orientuar drejt indeksimit të pagave siç dhe ligji e parashikon. Sa për Zotin Rama mendoj që po konsumon një konflikt artificial që më shumë ka të bëjë me uljen e autoritetit të gjyqëtarve dhe linçimin e tyre nga shqiptarët çka do i vlej atij më pas kur kjo drejtësi të ketë të bëjë dhe me vetë atë personalisht”, tha Gjikondi.

Më tej juristja tha se Rama ka filluar një fushatë kundër drejtësisë, denigruese, përçarëse dhe me pasoja të rënda morale dhe psikologjike për shqiptarët.

Gjikondi nënvizoi se Rama vërtetoi katëcipërisht mosndjeshmërinë, arrogancën e tij dhe mospërfilljen ndaj interesit kombëtar për një strukturë vlerash që trashëgohet në breza.

Juristja shtoi se shumë pak zëra publik e mbrojnë drejtësinë dhe kjo tregon infektimin dhe territorin që e liga ka arritur të pushtojë në jetën publike shqiptare.

“Aktualisht zoti Rama ka filluar një fushatë kundër drejtësisë, denigruese, përçarëse dhe me pasoja të rënda morale dhe psikologjike për shqiptarët. Duke vërtetuar katëcipërisht mosndjeshmërinë, arrogancën e tij dhe mospërfilljen ndaj interesit kombëtar për një strukturë vlerash që trashëgohet në breza. Shqipëria aktualisht është në një krizë të thellë morale. Pak shumë pak zëra publik e mbrojnë drejtësinë dhe kjo tregon infektimin dhe territorin që e liga ka arritur të pushtojë në jetën publike shqiptare”, tha Gjikondi./ CNA