“Ca e bëjnë punën shkel e shko”/ Artan Fuga u përgjigjet kritikëve: Hajdeni se do ju trajnoj falas

28 Qershor 2022, 08:34, Aktualitet CNA

Artan Fuga

Profesor Artan Fuga u është përgjigjur kritikëve që i komentojnë në rrjetet sociale, sipas tij me profile false.

Në një postim në "Facebook", Fuga shkruan se ata persona që merren me adresa jo të vërteta, në jetën e tyre i bëjnë punët shkel e shko, sa për t’i zënë gojën shefit të tyre.

Sipas tij, ata persona “nuk janë seriozë në punë a thua sikur paguhen vetëm me rrogë bazë! Profilet e tyre false janë vetëm me foto që ndjekin njëra tjetrën, ekspozohen thjesht surrate që nuk kanë lidhje me njeri-tjetrin, mbushur me urime për datëlindje të paqëna, me fraza shtampë”.

Profesori, në fund të reagimit të tij thekson se është i gatshëm t’i kualifikojë dhe trajnojë për mënyrën e komunikimit, falas.

Reagimi i plotë i Fugës:

Konstatim: ca bëjnë punë shkel e shko!

Këto tre katër ditët e fundit në profilin këtu janë shtuar zëra personash anonimë, profilesh fallco, me seks burri ose gruaje po të nisesh nga emrat që i vendosin vetes dhe që më japin këshilla miqësore për të mos trajtuar probleme sociale të aktualitetit, idotësisht e quajnë : Mos u merr me politikë, shkencat shih!, që më japin udhëzime plotë qetësi dhe dashuri se me kë duhet të ha akullore, me kë duhet të pi ujë, sa qofte ose byreqe duhet të ha, cilat janë temat që duhet të trajtoj kur ulem në tavolinë dhe pi ndonjë gotë verë, si duhet t'i trajtoj, etj. budallallëqe si këto!

Puna është se janë profile fallco, për fat unë jam i pajisur me të gjitha mjetet dhe teknikat për t'i dalluar menjëherë! Nuk merrem me ta sepse faqja e profilit i heq vetë automatikisht! I hedh në plehra pra! Ku e meritojnë!

Por, nuk e kam aty hallin!

Dua të njoftoj përgjegjësit e këtyre personave me profile fallco, me emra kodrapasbregut, që ata ja kanë varur punës, bëjnë punë shkel e shko dhe sa për të kaluar radhën. Sa për të thënë : shefo për kokë të djalit lodhem gjithë ditën më bie bretku!

Nuk janë seriozë në punë a thua sikur paguhen vetëm me rrogë bazë! Profilet e tyre fallco janë vetëm me foto që ndjekin njëra tjetrën, ekspozohen thjesht surrate që nuk kanë lidhje me njeri tjetrin, mbushur me urime për datëlindje të paqëna, me fraza shtampë, etj.

Si njeri i filozofisë të komunikimit kjo cilësi pune më sjell shije të keqe! Duket si punë në kooperativat bujqësore të kohës së rendimenteve të larta në drithëra!

Unë jam gati t'i kualifikoj, t'i trajnoj, pa lekë, gratis, t'u jap leksione dhe punë praktike, sepse edhe kështu nuk shkon!

Po kështu, njoftoj shefat e këtyre dembelëve që të paaftë për këtë punë e bëjnë detyrën shkel e shko që po humbasin kohën kot, i paguajnë kot, harxhojnë lekët kot, sepse teknologjitë e sotme të komunikimit i zerojnë të gjitha këto.

Audiencat e këtij profili falë qytetarëve që e ndjekin janë dhjetra e qindramijë në javë! Nuk kam atë qëllim, nuk më intereson fare shtimi i audimatit, sepse si tip unë parapëlqej vetminë, por edhe nuk kam çfarë të bëj! Jeta bën të vetën!

Ka rregullat e veta!

Sa më e ndytë ndyrësira, aq më shumë ajo del në dritë, dhe e mira kolektive e qytetarëve përforcohet!

Ditë të bukur të gjithëve!/CNA.al