Apeli i GJKKO, “grusht” në fytyrën e Veliajt/ E lë në burg

24 Shkurt 2026, 15:08, Aktualitet CNA

Apeli i GJKKO, “grusht” në fytyrën e Veliajt/ E lë

Apeli i GJKKO-së ka lënë në burg kryebashkiakun Erion Veliaj duke rrëzuar kërkesën e tij për zëvendësimin e masës së sigurisë.

Ky është një tjetër “grusht” në fytyrën e Veliajt, pasi kujtojmë se kryebashkiaku është lënë në burg në të gjitha nivelet e gjykatave.

Vendimi u mor nga gjyqtarja Nertila Kosova.

Gjatë seancës Veliaj kërkoi të njihej me disa nga aktet e prokurorëve që janë çuar në seancën e Apelit të GJKKO-së.

Aktet me të cilat donte të njihej kryebashkiaku janë lobimet e adresuara nga ai, raportet e publikuara nga Departamenti Amerikan i Drejtësisë, ku jepen raporti i lobimit, pagesat, sulmet dhe akuzat ndaj prokurorëve, gjyqtarëve.

Pas gjyqit në deklaratën e saj, edhe avokatja Teodoresku konfirmoi se aktet e prokurorëve ishin lobimet e Veliajt.

“Do ta kundërshtojmë. Veliaj kërkoi të njihet me provat e akuzës. Provat ishin po të njëjtat. Edhe nëse do të vazhdohet edhe në Gjykatën e Lartë, do të thonë po të njëjtat. Sjellin nga ndonjë gjë të re, siç ishte një procesverbal sot. Ishin të dy prokurorët në seancë. E bënë që është po e njëjtja gjendje, madje është agravuar. Aktet për të cilat kërkoi kohë ishte një procesverbal se ishte bërë një lobim, por nuk është e vërtetë.

Prokurorët e SPAK-ut u munduan të thoshin që jo ne i kemi në dispozicion, por ne kishim argumentin bazë se përse u kalua në themel duke u shkelur procedura që Erion Veliajt nuk iu vunë në dispozicion. Sot zonja e Apelit i vuri në dispozicion dokumentet e akuzës dhe e zgjidhi problemin ajo”, deklaroi avokatja.

Më 9 shkurt, GJKKO kaloi për gjykim dosjen "Veliaj". Mbi kryebashkiakun e arrestuar rëndojnë 13 akuza për 5 vepra të rënda penale.

Kujtojmë se para seancës së datës së sotme pati një tjetër fushatë sulmi ndaj drejtësisë, prokurorëve dhe SPAK-ut nga zaret mediatikë të Veliajt.

CNA zbërtheu tërësisht skemën duke treguar se këto janë thjesht dhe vetëm taktikat dhe manipulimet e kryebashkiakut që ndodhet në burgun e Durrësit dhe vijon të dirigjojë mediat ashtu siç rezultoi edhe në përgjimet e zbardhura nga CNA./ CNA