Anëtarja e KLP-së "djeg" Adnan Xholin?/ I përplas në fytyrë pagën dhe e quan egoist

16 Dhjetor 2022, 11:18, Aktualitet CNA

Anëtarja e KLP-së "djeg" Adnan Xholin?/ I përplas

Anëtarja e KLP-së, Nurihan Seiti, nuk e ka pritur se prokurori Adnan Xholi do të garojë për kreun e SPAK-ut.

Ajo e ka quajtur Xholin një profesionist egoist, pas shpalosjes së platformës nga ky i fundit.

Sehiti ka qenë e ashpër me Xholin, ndërsa ka deklaruar se nuk i pëlqen fakti se flet me superlativa për prokurorët e SPAK-ut, pasi sipas saj njësia matëse nuk është statistika por pritshmëria.

Sehiti i ka kujtuar Xholit se janë prokurorët më të paguar.

“Në fakt nuk e mendoj se do konkurronit vetëm për kohën, mendova se do shikonit ambientin, ecurinë, sepse duket se jeni një profesionit egoist në punën tuaj, në kuptimin e mirë të fjalës duke u nisur nga përvoja juaj, por ja që erdhët.

Nuk më pëlqen fakti që përsëri vazhdoni me mendimin me një mbiemër superior për prokurorët e SPAK-ut, sepse njësia matëse juaja nuk është statistika, por pritshmëria, dhe pyetja ime është çfarë pritshmërie do ketë komuniteti, jo ne, sepse jeni institucioni më i paguar, më i vlerësuar, më i pranishëm nga gjithçka tjetër që mund të ketë një magjistratë. Kush do jetë para publikut nga ata që ju do t’i çoni atje ku kanë vendin për këto 30 vite?”, është shprehur Seiti.

Prokurori Xholi nuk ka ndryshuar qëndrim pavarësisht tonit të ashpër të anëtares së KLP-së.

Xholi ka thënë se nuk i vjen mirë që i përmend pagën, pasi paguhen sa një drejtor në kryeministri.

“Duke qenë se në të vërtetë unë nga muaji shtator i vitit të kaluar kam filluar punë pranë kësaj strukture, por kam qenë shumë vite të tjera pranë së njëjtës strukturë.

Përulem para kolegëve për atë punë që kanë bërë. Pavarësisht pritshmërive të opinionit publik, ne jemi juristë, jemi njerëz, jemi qytetarë, nëse do kemi prova të cilat vënë para dyshimeve të arsyeshme se një zyrtar i lartë është i përfshirë nuk do t'u shpëtonte kthetrave të BKH-së por jo me opinion dhe fjalë boshe. ndaj duhen këto struktura, për të mbledhur prova. SPAK është krijuar falë vullnetit politik, mbështetjeve të partnerëve tanë SHBA-së dhe BE-së, pikërisht për të goditur korrupsionin në nivel të lartë dhe krimin e organizuar dhe terrorizmin.

Nuk jemi nga ajo trupë prokurorësh e cila mendohet dhe flitet në publik se është struktura më e mirëpaguar. Jemi njëlloj si të tjerët. Shtesat në vështirësi apo shtesat se kemi hequr dorë nga privatësia e rrit këtë pagë, por paguhemi sa një drejtor në Kryeministri. Grupi i pagës është G3”, është shprehur Xholi./CNA.al