Akse problematike, vërshim ujërash dhe abonentë pa energji elektrike/ Si paraqitet situata në qarkun e Korçës

19 Nëntor 2025, 20:09, Aktualitet CNA

Akse problematike, vërshim ujërash dhe abonentë pa energji

Sipas njoftimit zyrtar të autoriteve vendore në Korçë situata me pasojat e reshjeve të shiut në këtë qark mbetet problematike kryesisht për shkak të prurjeve të lumenjve dhe përrenjve në disa fshatra.

Problematike ngelet dhe situata e furnizimit me energji elektrike ku në total raportohen 148 abonentë pa energji.

1. Bashkia Korçë

Kalueshmëria e aksit Denas–Lekas u vështirësua për shkak të rritjes së nivelit të ujit. Nga strukturat e bashkisë Korçë është punuar për normalizimin e situatës.

Në Voskopojë, ujëmbledhësi arriti nivele të larta, por nga ndërhyrja me mjet fadromë për hapjen e kanalit shkarkues, situata është drejt normalizimit.

Në afërsi të fshatit Lubonjë, ka prezencë të shtuar të ujit dhe ura është vështirësisht e kalueshme dhe nga strukturat e bashkisë Korçë është punuar për normalizimin e situatës. Ka edhe rrugë alternative për t’u lidhur me pjesën tjetër të njësisë.

2. Bashkia Pogradec

Në fshatin Gështenjas pati ngarkesë me rrjedhjen e ujërave, por u ndërhy nga strukturat e nuk pati problematika.

3. Bashkia Maliq

Po monitorohet situata në pikën e bashkimit të lumit Dunavec e Devoll në fushën e Maliqit, pasi ka prurje shumë të larta uji.

4. Bashkia Devoll

Në fshatin Çetë, mbi Miras, urën e këtij segmenti është dëmtuar dhe strukturat vendore kanë marrë masat për ndalimin e qarkullimit, pasi situata paraqet rrezik për kalimtarët. Për këtë rast, do të përcjellim kerkesën për mbështetje nga Ministria e Mbrojtjes.

Është dëmtuar gjithashtu ura e Arrzës, por aksesi në fshat mundësohet nga një rrugë alternative dhe strukturat vendore të bashkisë në vazhdim do të marrin masa për rehabilitimin e saj.

Në fshatin Ziçisht u sinjalizuam për bllokimin nga inertet dhe strukturat vendore po marrin masat përkatëse.

5. Bashkia Pustec

Në segmentin Lajthizë–Liqenas ka pasur dalje uji në rrugë, sektori i shërbimeve ka ndërhyrë dhe situata është drejt normalizimit.

6. Bashkia Kolonjë

Fshati Mesiçkë: Rritje të prurjeve të lumit, rrezikim i urës së fshatit dhe i disa shtyllave të energjisë. Grupet kanë qenë në terren për normalizimin e situatës.

Fshati Mollas: Rruga pati prezencë uji dhe nga strukturat në terren u punua për normalizimin e plotë të situatës.

Rezervuari i Rotit ishte në prag të nivelit maksimal, u hapën shkarkuesit dhe po monitorohet situata.

Janë marrë masa gjithashtu për sigurimin e rezervuarit të vogël të Kodrës.

Në zonën e Shelegurit, pati prurje të shumta të përroit të cilat tejkaluan kapacitetet e urës, por situata u normalizua dhe po monitorohet nga kontraktori dhe inspektorët e Drejtorisë Rajonale Qendër-Lindje (ARRSH).

6. Nga Drejtoria Rajonale Qendër-Lindje (ARRSH) situata në akset rrugore kryesore paraqitet e normalizuar.

Aksi Ersekë–Leskovik: Kontraktori dhe inspektorët raportojnë situatë të menaxhueshme; ndërhyrjet po vijojnë.

Aksi Maliq–Lozhan, pranë kryqëzimit të fshatit Kolanec u kryhen punime për sistemimin e ujërave të përroit.

Aksi Qafë e Qarrit – Ersekë është i pastruar dhe i kalueshëm.

Aksi Qafa e Qarrit–Ersekë (rruga e vjetër) - U realizua pastrimi i urës nga pemët dhe materialet e sjella nga prurjet.

7. Ekipet e OSHEE-së po punojnë për rregullimin e defekteve dhe situata aktualisht është;

-Fideri Nst Gjanc pjesërisht në punë-10 abonentë pa energji në Shipskë e Krushovë.

-Fideri nr.17, Nst Korçë 1 kabinë jashtë funksionit -6 abonentë pa energji.

-Fideri nr.6 Nst Mollas pjesërisht në punë -90 abonentë pa energji.

-Fideri Vithkuq, Nst Rehovë pjesërisht në punë -42 abonentë pa energji.

Në total 148 abonentë pa energji./CNA