“200 milionë euro para taksapaguesish i bëni orgjira”/ Deklarata e fortë e Berishës, socialistët godasin tavolinat

20 Tetor 2022, 14:23, Aktualitet CNA

“200 milionë euro para taksapaguesish i bëni orgjira”/

Kreu i PD-së Sali Berisha ka lëshuar deklarata të forta sot nga foltorja e Kuvendit në drejtim të mazhorancës.

Sipas Berishës, 200 milionë euro para taksapaguesish janë bërë orgjira.

“200 milionë euro para taksapaguesish i bëni orgjira dhe vidhni në drejtime të tjera. Pra, si mund të kthehet ndryshe një pasuri e çmuar kombëtare në një mallkim kombëtar siç është shndërruar energjia për qytetarët shqiptarë. Nëse ti i pafytyrë që je aty ndërhyn në fjalën time…Zonjë të kanë zgjedhur kryetare parlamenti të të respektojnë ty në radhë të parë. Ai bëhet kryetar parlamenti aty. Ç’punë ka ai?”’, është shprehur Berisha, pasi ka ndërhyrë kreu i grupit parlamentar socialist Taulant Balla.

Gjatë debatit Berisha-Balla nuk munguan as gjuha fyese si dhe goditjet e tavolinës.

Deklarata e plotë e Berishës

Sot diskutojmë për një sektor, i cili është rasti më klasik se si një pasuri kombëtare është shndërruar në një mallkim kombëtar.
Një pasuri e çmuar kombëtare, falë një strategjie të nisur në vitin 2007, u arrit të mbidyfishohej prodhimi i energjisë hidrike.
Fakti është se në vitin 2021, Shqipëria prodhoi 9 terravat energji,nga e cila konsumon vetëm 7.
Fati tragjik është se biznesi i vogël shqiptar paguan tarifat më të larta në Euriopë, falë rritjes katastrofike që i bëtë ju.
Fakti tjetër është se po vidhni në mënyrën më të papërmbajtur. Sepse si në asnjë vend tjetër, e shisni energjinë e digave te agjentët tregtarë tuaj me 40 euro megavati, dhe ai e shet në bursa me 120 euro dhe ju sjell të gjithë fitimin që keni përcaktuar së bashku.
Fakti është se ju merrni në pikun e energjisë, energji nga Kosova, që e depoziton këtu që t’ia ktheni kur të keni. Ju atë energji, e rieksportoni dhe hapni digat, vetëm e vetëm për të përfituar dhe vjedhur.
Ju keni krijuar në sistemin energjetik nj rrjet vjedhjes më gjigante në Europë dhe botë.
Ju hapni tendera në një platformë dixhitale të paverifikuar nga askush përveç grupit të hajdutëve me të cilët vidhni. Këtu hapni tendera për 300 milionë euro. Hap e mbyllë sytë, fap e fap, shpallet fituesi me 99.99 përqind. Ju vidhni e vetëm vidhni.
Ju keni instaluar kohët e fundit një sistem vjedhje të qytetarëve në pallatet private të vjetra. OSHEE ka urdhëruar që t’u faturohet pallateve të vjetra pa ashensor, pa pompa uji, që kanë vetëm 5 llampa, ju u faturoni 600 kilovat në orë. Çdo familje duhet të paguajë vjedhjen tuaj. Dhe thoni se keni ulur humbjet.
Po gropa e zezë jeni ju si qeveri. Që nuk paguani tarifat e konsumit të energjisë nëpër institucione. 200 milionë euro para të taksapaguesve ju i bëni orgjira dhe vidhni në drejtime të tjera.
Si mund të kthehet ndryshe një pasuri e çmuar kombëtare, në një mallkim kombëtar?
Ky është mekanizmi i shndërrimit në mallkim kombëtar të një pasurie mahnitëse./CNA.al