Korporata e Investimeve Shqiptare/ Gjykata Kushtetuese rrëzon kërkesën e LSI

5 Maj 2022, 14:29, Politikë CNA

Gjykata Kushtetuese rrëzoi sot kërkesën e LSI për shpalljen si antikushtetues të Ligjit 71/2019 “Për Korporatën e Investimeve Shqiptare”.

Këtë vendim e bën të ditur ish-ministri Petrit Vasili, i cili ngre akuzat se Gjykata nuk e shqyrtoi fare këtë kërkesë.

Vasili pretendon se Gjykata Kushtetuese as nuk e diskutoi në seancë plenare, por e mbylli në një dhomë të mbyllur duke vendosur se LSI nuk është legjitime si palë për t’ju drejtuar këtij institucioni.

Sipas tij, Gjykata Kushtetuese është një gardiane e interesave më të errëta të Rilindjes.

?E vendosur hapur si një gardiane e interesave më të errëta të Rilindjes, Gjykata Kushtetuese në mënyrë të përsëritur ka zgjedhur t?i shmanget përballjes për mbrojtjen e interesit publik me qëllimin e vetëm për të mos prekur interesat miliarderë të Rilindjes në pushtet.

Në të njëjtin pozicion të neveritshëm Gjykata Kushtetuese mbajti edhe ndaj Kërkesës së LSI për ligjin e Vetëqeverisjes vendore, kur Rilindja hoqi nga Ligji për Vetëqeverisjen vendore të shumicës së cilësuar për marrjen e vendimeve me interes të lartë publik.

Ky vendim legjitimoi dhe i hapi rrugën grabitjes së pashembullt mafioze nga Pushteti Vendor monist rilindas të pronave publike, dhe pastrimit pasues të parasë për interes të Rilindjes.

Të njëjtin pozicion të neveritshëm kjo Gjykatë mbajti edhe për Zgjedhjet Vendore moniste njëpartiake të vitit 2019 dhe ankimimit të Shoqatës së Bashkive duke mos marrë asnjë pozicion për këtë ngjarje, më të rëndën e më skandalozen për demokracinë shqiptare.

Po kështu e neveritshme u paraqit kjo Gjykatë Kushtetuese duke mos e dënuar fare e duke mos mbajtur qëndrim ndaj procedures antiligjore, mafioze dhe të falsifikuar të Kuvendit të Shqipërisë për shkarkimin e Presidentit dhe duke e shndërruar Gjykatën në vegël qorre të Rilindjes dhe mbështetëse të dhunimit te Kushtetutes dhe të Ligjit prej saj?, shkruan ai në rrjetet sociale.

Më tej, Vasili deklaron se Gjykata Kushtetuese është kthyer në Korporatë Rilindase dhe armike të interesit publik.

?Për këta të Gjykatës Kushtetuese nuk qenka legjitime një parti parlamentare e votuar nga dhjetëra mijëra qytetarë dhe që mbron, fort dhe bazuar në kushtetutë e ligj, interesin publik.

Dhe na qenkan legjitime këta lakej të Rilindjes në Gjykatën Kushtetuese, që u zgjodhën hapur nga Rilindja dhe tani po veprojnë haptas si shërbëtorë të saj pa moral ligjor e personal.

Pozicionimi i kësaj Gjykate Kushtetuese si Korporatë Rilindase, duke mos u shprehur dhe duke u shmangur, që të japë opinionin e saj e ka kthyer atë nga mbrojtëse e natyrshme e interesit publik, në armike të interesit publik duke u vendosur trashë dhe në mënyrë vulgare ne krah të Rilindjes dhe veprimeve të njëpasnjeshme korruptive, antiligjore dhe antikushtetuese të saj.

Mendimi i përgjegjshëm dhe kushtetues i pakicës në këtë Gjykatë, ishte një mundesi luajale për të nxjerrë Gjykatën Kushtetuese nga bataku Rilindas ku ajo ka rënë dhe për të ulur sado pak zhgënjimin mbarëpopullor me këtë Gjykatë gjoja pjellë e Reformës së abortuar në Drejtësi. Por shumica Rilindase e kapur për fyti, e refuzoi këtë mundësi duke thelluar akoma më shumë zhgënjimin dhe zemëratën ndaj saj.

Sot mund të thuhet me gojën plot se pa as më të voglin diskutim kjo Gjykatë Kushtetuese zhgënjyese është vite dritë larg Gjykatës Kushtetuese të mëparshme, e cila u qëndroi përballë të gjitha qeverive të majta e të djathta në emër të interesit më të lartë publik?, nënvizon ish-ministri i LSI./ CNA.al