“Basha ka përçarë partinë”/ Deputeti i PD: Duhet të japë dorëheqjen

12 Mars 2022, 11:34, Politikë CNA

Edhe deputeti i PD, Fatjon Veizaj i është bashkuar zërave për dorëheqjen e Lulzim Bashës.

Në një postim në rrjetet sociale, Veizaj shkruan se Basha ka detyrimin e mundësinë të ndihmojë opozitën përmes dorëheqjes me dinjitet, nxitjes dhe mbështetjes së një procesi rindërtimi të thellë politik, moral dhe strukturor të partisë.

Duke u ndalur tek vendimi i 9 shtatorit, kur Basha përjashtoi Berishën nga grupi parlamentar, Veizaj thekson se ishte një vendim personal i tij, për të cilin tha se do mbante përgjegjësi dhe se nuk do lejonte përçarjen e partisë.

Por, ai thekson se PD u përça, dhe Basha nuk mbajti asnjë përgjegjësi.

?Të nderuar miq,

Hyrja në jetën politike pas një përvoje pune të gjatë nga bota e biznesit, përfshirja si njeri i lirë dhe duke mos pasur nevojë për të qenë aty me cdo kusht dhe kundër parimeve të mija, besoj se më jep mundësinë të jem i drejtpërdrejtë e i pavaruar në ato që kam për të thënë mbi gjendjen e krijuar së fundi në Partinë Demokratike.

Në fillim, opozitës shqiptare sot i duhet të (ri)marrë përgjegjësinë e përfaqësimit, të dëshmojë qartësisht, pa mëdyshje dhe drejtpërdrejt se nuk do t’u humbasë më kohë ndjekësve të saj dhe me gjerë.

Pas humbjes së rëndë të 6 marsit, nuk mund të pajtohem me qëndrimin e Kryetarit të Partisë Demokratike.

Më qartë, nuk pajtohem me mungesën e të vetmit qëndrim të arsyeshëm që Z. Basha duhet të mbajë e që sipas meje është dorëheqja! Ai ka detyrimin e mundësinë të ndihmojë opozitën përmes dorëheqjes me dinjitet, nxitjes dhe mbështetjes së një procesi rindërtimi të thellë politik, moral dhe strukturor të partisë.

Krisja, që u bë e dukshme në shtator dhe, që për hir të së vërtetës, i ka rrënjët goxha të thella në mendësinë e praktikën politike të Partisë Demokratike, nuk mund të mos sillte pasoja.

Kryetari e mori vendimin në vetë të parë, me zotimin se nuk do të lejonte përçarjen e partisë dhe se do të mbante po ashtu, përgjegjësi vetjake, politike e njerëzore.

Nuk ndodhi. Partia u përça. Në të vërtetë, demokratët u shtynë në një konflikt të dëshpëruar e absurd. Me sa u duk kryetari nuk e njihte mirë ADN-në e tyre politike dhe dështoi.

Edhe Dr. Berisha, i cili pa asnjë dyshim ka mbështetje të gjerë e të padiskutueshme në parti, u rikthye, gjithashtu, kur u ‘cënua në vetë të parë’.

Pavarësisht frazeologjisë dhe pragmatizmit të zakonshëm në raste të tilla, unë prirem t’u besoj fakteve.

Mbi to, pavarësisht motivit që i nxiti dhe implikimit të pashmangshëm moral, gjykoj se Dr. Berisha i bëri një shërbim të fundit partisë – për të cilin nuk duhet të kërkojë shpërblim.

Z. Basha, në anën tjetër, ka marrë mjaft nga Partia Demokratike. Ai ka kohë mjaftueshëm, ta nisë e ta rinisë në çdo pozicion të ri karrierën e vet në Partinë Demokratike, por shumë të tjerë, demokratë të thjeshtë, qindra mijra qytetarë shqiptarë, nuk kanë kohë.

Kjo është bindja ime e pavaruar, e pandikuar dhe e padetyruar ndaj askujt, veç njerëzve që na kanë besuar përfaqësimin.

Nuk ka kohë për të humbur!?-shkruan deputeti Fatjon Veizaj./CNA.al