Adela Kryeziu përjashton koalicionin me Ramën, Bashën dhe Metën/ “Synimi i Lëvizjes për Ndryshim është...”

7 Prill 2021, 15:46, Politikë CNA

Partitë politike shpesh herë kanë shkelur besimin e qytetarëve dhe kanë abuzuar me to vetëm për pushtet. Pas sulmeve që lëshojnë ndaj njëri tjetrit, papritur shfaqen në ccdo ekrat të mundshëm duke nënshkruar marrëveshje dhe nisin bashkëqeverisjet.

Por Lëvizja për Ndryshim, ka lindur si parti kundër tre kryetarëve në vend dhe si e tillë e përjashtojnë në mënyrë kategorike një koalicion me Edi Ramën, Lulzim Bashën apo edhe Ilir Metën.

Një gjë të tillë e pohoi edhe bashkëthemeluesja dhe kandidatja për Shkodrën e kësaj partie Adela Kryeziu. Në një intrevistë për CNA.al ajo tha se synimi i Lëvizjes është të jetë forcë përcaktuese në qeverinë e ardhshme dhe kryeministër të jetë një njeri i pakorruptuar.

?Ne synojme të jemi forcë përcaktuese në qeverisjen e ardhshme, duke imponuar zgjedhjen e një kryeministri të pakorruptuar. Sigurisht ky person nuk mund të jetë as Edi Rama, as Luzim Basha dhe as Ilir Meta, si përgjegjësit kryesore të krizës që po përjeton sot vendi. Shqipëria ka plot njerëz me integritet, vizion, që nuk bëjnë kompromise me parimet e vlerat dhe që interesin kombëtar e kanë më të madh se atë personal?, tha Kryeziu.

Kandidatja e Lëvizjes për Ndryshim e pyetur për një koalicion Rama-Basha pas 25 prillit u shpreh: ?Në politikë asgjë nuk është e pamundur dhe nuk mund të përjashtohet si skenar. Një marrëveshje e tillë u realizua dhe në vitin 2017 ku Z.Basha u mandatua ?ministër i opozitës?. Pas 25 prillit thjesht mund të shohim ?ceremoninë? publike?.

Adela Kryeziu thekson më tej se pjesë e Lëvizjes për Ndryshim janë persona me kapacitet dhe që bëjnë diferencën, të rinj të përkushtuar dhe që e duan vendin, jo karrigen e Parlamentit.

?Është e vërtetë, që Lëvizjes për Ndryshim i janë bashkuar profesionistët më të mirë të të gjitha fushave dhe kjo është për tu krenuar. Unë mendoj që asnjë parti tjetër nuk ka kapacitetet e kandidatëve të LN dhe që këtu fillon diferenca që kemi. Ajo që na bashkon të gjithëve ne është dashuria për vendin. Për secilin nga ne, kryesore është arritja e objektivave që kemi si mënyrën e vetme për zgjidhjen e krizës që vendi po përjeton dhe jo thjesht përfitimi i një karrigeje në Parlamentin e ardhshëm?, tha Kryeziu.

Në fund, kandidatja e Lëvizjes për Ndryshim kishte edhe një mesazh për të gjithë qytetarët.

?25 prilli do jetë një ditë vendimtare për të ardhmen e Shqipërisë, jo vetëm për 4 vitet që pasojnë, por për dekadat që do vijnë. Ndaj vendimet që ne marrim sot do kenë një impakt të rëndësishëm në të ardhmen e vendit. Është koha të bashkohemi, të marrim në dorë fatet tona, për të ndryshuar realitetin që jetojmë, për të ndërtuar një të ardhme të sigurt dhe europiane?, tha Adela Kryeziu për CNA.al.