Frika se mos marrë pak vota/ Lulzim Basha urdhër kandidatëve: Loboni që të votohem unë në Tiranë

31 Mars 2021, 17:22, Politikë CNA

Mundësia që qytetarët të votojnë edhe kandidatin, përveç partisë, duket se ka ndezur garën brenda llojit në këtë fillim fushate dhe Edi Rama e Lulzim Basha po përballen me efektet e para anësore të saj.

Kryesocialisti, ndoshta nga droja se rivaliteti brenda socialistëve mund të minojë misionin e përbashkët të tyre, që është marrja e mandatit të tretë, mblodhi kandidatët për t?u përçuar mesazhin që të kërkojnë vota për partinë dhe të mos përqëndrohen tek vota personale.

Porosia e kreut të Partisë Socialiste iu përçua kandidatëve gjatë një mbledhjeje të zhvilluar online me kandidatët për deputetë mbrëmjen e së martës.

Mësohet se Rama u ka tërhequr veshin kandidatëve në lidhje me posterat e shpërndarë përmes rrjeteve sociale dhe të afishuar edhe fizikisht në vende publike, ku ka identifikuar disa raste ku më shumë del në pah numri personal i kandidatëve në fletën e votimit se sa numri 12, që është ai i Partisë Socialiste.

Rama e ka argumentuar këtë kërkesë me faktin se promovimi i numrave personalë nga kandidatët mund të pështjellojë votuesit dhe një pjesë e tyre të marrin për numër partie numrat e tyre, duke orientuar votën gabim. Vërejtje ka pasur edhe për kandidatët e vendosur në zonat e rehatshme të listave, të cilëve kryesocialisti u ka kërkuar më shumë angazhim.

Nga kampi i Partisë Demokratike kauza për të larguar Ramën duket se ka shmangur luftën e ashpër brenda llojit. Kandidatët e PD dhe koalicionit kanë marrë një udhëzim, ku u përcaktohet formati i posterave dhe u ndalohet ndryshimi i tij, apo modifikimi duke përfshirë në këto postera edhe numrin personal, përpos numrit 9, që është numri i partisë në fletën e votimit.

Arsyetimi i këtij vendimi të demokratëve është i njëjtë me atë të socialistëve, për të mos shkaktuar pështjellim e amulli tek votuesit.

Udhëzimi përgjithësisht është zbatuar dhe përjashtim deri më tani bën vetëm rasti i Fatmir Mediut, që në rrjetet sociale kërkon edhe votën personale tek numri 7, Mesila Dodës, numri 12 dhe Korab Litës, numri 33.

Por, megjithëse publikisht përçohet një frymë uniteti sa i takon orientimit të votës më 25 prill me theks vetëm te partia, nën rrogoz luhet edhe gara për votën personale dhe në këtë garë burime të gazetasi.al thonë se është përfshirë edhe vetë Lulzim Basha.

Megjithëse Kodi Zgjedhor i mundësonte që të kandidonte deri në 4 qarqe, Basha zgjodhi që ta vendosë emrin vetëm si i pari në listën e Tiranës. Angazhimet si kryetar i partisë dhe udhëheqës i opozitës ja kërkojnë që të zhvillojë fushatë në të gjithë vendin, duke kërkuar vota për PD dhe koalicionin që drejton nga veriu në jug të vendit.

Kjo rrezikon që t?i minimalizojë votën personale në Tiranë. E për të shmangur këtë, burime të sigurta të gazetasi.al flasin për një ?urdhër?, apo ?marrëveshje të heshtur? brenda njerëzve më besnikë të kryedemokratit, e që janë përfshirë në fushatën e kandidatëve të Tiranës, që gjatë takimeve me qytetarët, veç votës për partinë të orientojnë edhe votën personale për Lulzim Bashën.

Kjo kërkesë për votë personale nuk lidhet me faktin se Lulzim Basha mund të mos zgjidhet si deputet, pasi askush nuk e beson se ai nuk do të marrë votat e mjaftueshme personale për ta arritur këtë, e aq më tepër është edhe i pari në listë. Kërkesa, thonë burimet, është më shumë çështje imazhi, apo prestigji, që mund të dobësoheshin në rast se udhëheqësi i opozitës nuk është i pari me votën personale.

Pyetja që lind është se kush mund t?ja ?kërcënojë? primatin Bashës në listën e PD-së? Po t?i hedhësh një sy listës së Tiranës aty identifikohet vetëm një numër e një emër, numri 4: Sali Berisha!/tema