Dorëheqjet që tronditën vendin në 2019-ën

2 Janar 2020, 07:50, Aktualitet CNA

Dorëheqjet e deputetëve të opozitës dhe krerëve të partive opozitare ishin një befasi shumë e madhe për qytetarët shqiptarë dhe jo vetëm. Pas thirrjes së kreut të PD-së për të djegur mandatet, të gjithë partitë e koalicionit opozitar kryen veprimin ekstrem të dhënies së dorëheqjes nga mandatet e deputetëve. Të shoqëruar nga Lulzim Basha, Monika Kryemadhi dhe aleatët e tjerë, deputetët dorëzuan mandatet në kryesinë e Kuvendit.

Por, jo vetëm këto dorëheqje ishin të papritura. Kryebashkiaku i Shkodrës, vetëm pas disa javësh, në krye të kësaj bashkie, dha dorëheqjen. Largimi i tij lidhet me publikimin e disa dokumentave nga opozita, ku faktohej se socialisti ishte i dënuar për drogë, në vitin 2003, në Itali dhe se ishte dëbuar nga autoritetet e shtetit fqinj. Ndërkohë Pjetri, pretendon se, nuk ishte në dijeni të këtij dënimi.

Një tjetër dorëheqje ishte ajo e drejtoreshës së Autoritetit Rrugor Shqiptar (ARRSH), Sonila Qatos. Dorëheqja e saj erdhi menjëherë pas padisë së ngritur nga kompania “Gjoka Construction”, lidhur me garën për tenderimin e tunelit në rrugën, Kardhiq-Sarandë.

Edhe largimi i papritur i Agron Tares nga posti i drejtorit të Portit të Durrësit ishte një befasi për publikun. Lajmin e bëri të ditur vetë Tare, i cili përmes një mesazhi në rrjetet sociale deklaroi se do të vijojë rrugëtimin e tij, profesional. Ai u emërua si Drejtor i Përgjithshëm Ekzekutiv i Autoritetit Portual Durrës në janar të 2019-ës, dhe dha dorëheqjen në fund të tetorit.

Valbona Sako është socialistja që dha dorëheqjen nga drejtimi i bashkisë së Durrësit vetëm pak kohë pasi kishte marrë mandatin. Sako shokoi mbarë opinionin publik me deklaratën se, duhet të jemi të kënaqur me 50 viktimat e tërmetit të 26 nëntorit dhe kjo gjë e prit shumë keq. Pas kritikave të shumta, Sako dha dorëheqjen, duke e lënë Durrësin në momentin më të keq, pa drejtues.

Përveç rasteve në vend, dy dorëheqje mjaft të bujshme konsiderohen dhe ato të kryeministrit të Maqedonisë së Veriut, Zoran Zaevit. Haradinaj dha dorëheqjen menjëherë pasi Gjykata Speciale e Hagës e thirri për të dëshmuar si i dyshuar për krime lufte. I emocionuar dhe me lot në sy, kryeministri ende në detyrë i Kosovës tha se nuk dëshiron të shkojë në Hagë, si kryetar qeverie.

Ndërkohë dorëheqja e Zoran Zaev lidhet me integrimin e Maqedonisë së Veriut në BE. Kur Këshilli Evropian votoi për shtyrje të negociatave me Shqipërinë dhe Maqedoninë e Veriut për në 2020-ën, Zaev në një deklaratë për shtyp dha dorëheqjen ashtu siç e kishte paralajmëruar edhe më parë nëse dështonin negociatat./ CNA.al