Rindërtimi pas tërmetit/ Ahmetaj zbulon se si do të proçedohet me ndërtesat e dëmtuara

3 Dhjetor 2019, 14:45, Politikë CNA

Këshilli i ministrave ka filluar punën për hartimin e programit të rindertimit të zonave të prekura nga tërmeti i fuqishëm i 26 nëntorit.

Programi do të jetë i ndarë në tre faza, që kanë të bëjnë me pastrimin e të gjitha inerteve nga territori i Durrësit, i Thumanës apo territoreve të tjera ku ka rrënoja.

Gatë fjalës së tij, Arben Ahmetaj ka theksuar se spostimi do të bëhet në Porto Romano.

Ndërkohë që faza e dytë që fillon në 1 janar, ka të bejë me bonusin e strehimit për qytetarët që nuk kthehen dot në shtëpitë e tyre për shkak të dëmtimit në atë masë ku banesat janë të pabanueshme.

?Për pjesën rurale do të ofrojmë përveç bonuseve edhe shtëpi ekologjike, të cilat sigurisht janë strehim i përkohshëm dhe objektivi afatgjatë i qeverisë, i Kryeministrit, është ndërtimi i 10.000 (dhjetë mijë) apartamenteve në qyteza urbane, specifike, të veçanta.

Me këtë, qeveria edhe Kryeministri duan të shmangin edhe ato gabime të mundshme që janë bërë në 30 vite, ku është ndërtuar aty ku nuk duhej ndërtuar, pra ndërtimet jo vetëm do të plotesojnë nevojat e të gjithë atyre qytetarëve që nuk kthehen dot fatkeqësisht në shtëpitë e tyre për shkak se ato janë demtuar në mënyrë të pakthyeshme apo kërkojnë investim afatgjatë serioz. Mendohet që një qytezë e re do të ndërtohet në Durrës.

Afatmesëm fillojmë me 5.000 (pesë mijë) apartamente, do të fillojnë menjehere. Një qytezë e re në Durrës, një ndërtim i ri në Thumanë, dy ndërtime po akoma nuk janë vendosur lokacionet, në Tiranë, bëhet fjalë ndoshta për tek ish zona e autotraktorëve dhe ndoshta në Kombinat. Pra, dy qyteza urbane të reja, siç edhe e theksova, e njëjta gjë do të ndodh edhe në Thumanë, e njejta gjë në dimensionin e kërkuar edhe në Lezhë, pra në të gjitha zonat ku ka dëmtime dhe qytetarët nuk kthehen dot në shtëpitë e tyre.

Dua të theksoj që pjesë e hapit të parë të rindërtimit është jo vetëm pastrimi i inerteve, është edhe rrëzimi i atyre pallateve, të cilat tani mund të përbëjnë rrezikshmëri për qytetarët që kalojnë pranë, apo që dita i sjell të kenë të bëjnë me territore afër këtyre ndërtesave. Ky eshte pak a shume le të themi plani në përgjithësi, institucione, emergjenca dhe ministri Çuçi është 24 orë në punë. Janë dy le të themi koordinime të ndryshme, ajo që ben Ministri Çuçi me stafin e vetë të emergjencës ka të bëjë me emergjencën menjëhere pas termetit, ndërsa rindërtimi është patjetër më afatgjatë, le të themi që është shumë më i detajuar, ka edhe domosdoshmërinë e vlerësimit paraprak, vlerësimit final dhe të adresimit të kostove.?, është shprehur Ahmetaj./CNA.al