"Zhduken" fondet për reformën në drejtësi/ Skandali, që u fsheh nga Meta

8 Gusht 2019, 09:43, Politikë CNA

Me 22 korrik 2016, Parlamenti i Shqipërisë votoi unanimisht për të ndryshuar 1/3 e Kushtetutës me qëllim që të transformohej sistemi i drejtësisë, në mënyrë që të trajtohet si duhet korrupsioni, krimi i organizuar si dhe heshtjet e përditshme në Gjykata e Prokurori.

E gjitha është e përmbledhur në atë çfarë quhet reformë në drejtësi.

Ndërsa pritet që reforma në drejtësi dhe isntitucionet e prodhuara prej saj, të pastrojnë sistemin e drejtësisë, nuk dihet se u ka kushtuar shqiptarëve i gjithë ky proces.

Gjithashtu nuk dihet se cilat kanë qenë shoqëritë civile që janë paguar dhe sa kanë qenë fondet.

Gjithçka ka mbetur në errësirë në kohën që kryetar Kuvendi ka qenë Ilir Meta dhe kryetari i komisionit të reformës në Drejtësi, ish-Ministri i Brendshëm Fatmir Xhafaj.

Në vendimin numër 61/2018, në nenin 25 thuhet pastër dhe qartë se Kuvendi duhet të bëjë transparencë të fondeve që sigurojnë hartim legjislacionit, brenda dy muajve nga miratimi i Ligjit.

“Kur organizatat e shoqërisë civile, ose grupet interesit kanë siguruar fonde për projekte që sigurojnë asistencë për hartim legjislacioni, në bashkëpunim të drejtpërdrejtë me Kuvendin, brenda dy muajve nga miratimi i Ligjit , bëjnë trasnparencën financiare, të projektit dhe publikojnë shpenzimet në daqen zyrtare të Kuvendit”, thuhet në nenin 25 të vendimit numër 61/2018.

CNA.al ka bërë një vëzhgim në faqen e Kuvendit dhe ndonëse ka bërë tre vite nga miratimi i paketës së reformës në drejtësi, nuk janë publikuar shpenzimet.

Kjo situatë prodhon dyshime se shoqëritë civile që kanë marrë në hartimin e paketës së reformës në drejtësi, nuk janë mjaftuar vetëm me fondet që kanë marrë, por po zaptojnë edhe institucionet e ngritura nga reforma në drejtësi.

Ilir Meta i mbajti të fshehura, tashmë duhet t’i zbardh Gramos Ruçi.

Ku i fundit duhet të zbatojë nenin 25 të vendimit të vendimit numër 61/2018, duke hedhur dritë mbi errësirën që ka instaluar më herët Ilir Meta që në kohën e miratimit të reformës në drejtësi ka qenë kryetar Kuvendi.

Nëse procesi ka qenë i ligjshëm përse duhet të mbahen sekret emrat shoqërisë civile që kanë marrë pjesë në hartimin e paketës së reformës në drejtësi dhe pse duhet të mbahen sekret fondet që janë dhënë.

Tek e fundit, bëhet fjalë për taksat e qytetarëve dhe nëse Ilir Meta nuk e ka problem t’i zhvasë qytetarët dhe t’i fshehë, Gramoz Ruç nuk duhet ta lejoj një gjë të tillë./CNA.al