E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Kush është në fakt, koalicioni i Bashës

23 Prill 2019, 12:11, Aktualitet CNA

Sot kryetari i PD-së, Lulzim Basha, edhe pse nuk ka zgjedhje apo fushatë elektorale, për të prodhuar lajm shpalli koalicionin e tij opozitar, të cilin në fakt e ka pasur, por sot për të disatën herë u mblodh në një sallë dhe firmosi.

Por me kë?

Lulzim Basha firmosi me Monika Kryemadhin e LSI-së, kryetaren e partisë së bandës së Ilir Metës, tetë vite në pushtet, katër vite me Berishën dhe katër me Ramën. Ilir Meta i kapur me bllok në dorë, ministrat e tij hajdutë që shëtitën sa në një ministri në tjetrën. Katër të vrarë në Bulevard për bllokun e Ilirit, të cilët u harruan pas ngjalave në Gjirin e Lalzit.

Në themelimin e saj, LSI-ja u quajt Lëvizja e Skraparllinjve të Inatosur, që në fakt është lëvizja e hajdutëve të Ilir Metës që sot firmos në koalicionin e Lulzim Bashës dhe këto vite që me themelimin e LSI-së, kjo forcë të duket si hirushja e politikës, kur në fakt është e përdala e saj.

Luli firmosi edhe me çamët e PDIU-së, me ish-kryedoganierin hajdut të Fatos Nanos, që në emër të çështjes çame themeloi një parti, ku ashtu si LSI-ja sa me Berishës sa me Bashën rrëmbeu llokma nga pushteti. Futi dhe tre deputetë në parlament dhe asnjë nuk është me kryetarin, por të gjithë janë me kryeministrin.

Lulzim Basha firmosi me Vangjel Dulen, i cili mori një PBDNJ me gati 80 mijë vota dhe e katandisi në partiçkë, që shkonte nga Nano tek Berisha, tek Rama e tek Basha.

PDIU dhe PBDNJ janë parti kundërshtare, në formën dhe n qëndrimin e tyre, por janë bërë bashkë me Lulin edhe pse ikën nga Edi Rama për inat të njëri-tjetrit.

Të ngelur me gisht në gojë, duke mos ditur ku të futen çamë dhe grekë, janë bashkuar nën sqetullën e ngrohtë të Lulzimit.

Agron Duka, kreu i partisë Agrare, ish-ministër i Fatos Nanos, ish-sekretar i Edi Ramës, i cili mori drejtimin e PAA-së në 2016-ën, është i vetmi kryetar i partive opozitare që Basha nuk i dha as mandat deputeti.

Nard Ndoka i Demokristianëve, të cilët kanë katandisur me nja gjashtë a shtatë parti, dikur ministër i Berishës, në 21 janar ishte me pushkë kundër tij, sot firmos me Lulin dhe ka vota më pak se një këngëtar tallavaje në një sallë të mbyllur.

Të gjithë të mësipërmit janë aleatët opozitarë të Lulit që me partitë e tyre mbushin një furgon me vota, përjashtuar ndonjë tek tuk që mund të sigurojë vota personale.

Në finale koalicioni opozitar duhet ta ketë emrin aleatët e Lulit, që janë grindur me Ramën. Nuk po flasim për Fatmir Mediun e Gërdecit apo edhe Dash Shehin dikur të akuzuar si tradhëtarë. Këta dy të fundit janë aleatët natyralë të PD-së.

Ç’të thuash më shumë për aleatët e Lulit, ku shumica e këtyre partive janë pa kryesi dhe kanë mbetur vetëm me kryetarë./ CNA.al