Çfarë ka Basha me 20 shkurtin?

16 Mars 2018, 16:03, Aktualitet CNA

CNA.al ka publikuar pak më parë dokumentin që tregon se Lulzim Basha ka përfundimisht një qëllim të vetëm ka, shkatërrimin përfundimtar të Partisë Demokratike, ndryshimin e historisë dhe vlerave të saj.

Mesa duket Basha është i vendosur që Partinë Demokratike, ta kthejë në partinë e tij personale, dhe tashmë pasi e përdhosi duke i mohuar kontributet dhe vlerat historike, po kërkon t’i zhdukë dhe datat dhe simbolikat. Është i njëjti Lulzim Bashë, që rreth 8 muaj më parë zhduku simbolet dhe logon zyrtare të Partisë Demokratike nga fushata elektorale. Tani në një akt tjetër thuajse po aq kriminal, Lulzim Basha kërkon zhdukjen e 20 shkurtit 1991, një datë historike në përkujtim të viktimave të komunizmit.

Projektligji i përgatitur me porosi dhe urdhër të Lulzim Bashës, nga këshilltari për ligjet në Partinë Demokratike, Gazment Bardhi. Ky është personi që ka hartuar ligjin, e më pas është firmosur nga deputetët në rresht por pa u lexuar, sepse atyre u është thënë se kërkohet që një datë tjetër si simbolikë për viktimat e komunizmit, siç është data 23 gusht.

Në fakt nuk ka ndodhur kjo. Projektligji është pjesë e aktmarrëveshjes kriminale të Lulzim Bashës, me Edi Ramën, dhe Basha po e përdor atë marrëveshje për të shkatërruar gjithçka që ka peshë dhe vlerë në Partinë Demokratike, duke mohuar edhe ditën kur është tërhequr zvarrë monumenti i diktatorit, si një hakmarrje për krimet e tij 45-vjeçare.

Ligji i propozuar në Parlament nga një pjesë deputetësh të Partisë Demokratike, të cilën mund ta lexoni në linkun e mëposhtëm së bashku me dokumentet përkatëse, është një akt i turpshëm që bëhet jo nga ata deputetë që e propozojnë, por thjeshtë dhe vetëm nga kreu i Partisë Demokratike Lulzim Basha. Ai i cili është porositësi dhe urdhëruesi i ligjit.

Mësohet se disa prej deputetëve e kanë firmosur në mirëbesim projektligjin, pasi u është thënë, firmoseni këtë ligj sepse do të vendosim një datë të dytë, pra do të ketë dy data, 20 shkurti dhe 23 gushti. Por në fakt qëllimi ka qenë heqja e 20 shkurtit. Në mirëbesim disa deputetë kanë firmosur projektligjin e propozuar nga Luli, përgatitur nga Luli dhe firmosur prej tyre. Shumë prej tyre mësohet se, tashmë janë tërhequr nga firma dhe kundërshtojnë projektligjin e Lulzim Bashës, që kërkon mohimin e 20 shkurtit dhe mohimin e historisë së Partisë Demokratike, si një forcë antikomuniste, që shembi dhe rrëzoi diktaturën në Shqipëri.

Ndoshta Lulzim Basha është shumë i lumtur pranë familjarëve dhe të afërmve të tij, pranë historive me oficera dhe trashëgimisë dhe lidhjeve të tij të forta që ka me ish-komunizmin. Megjithëse ka qenë një i ri dhe nuk ka pasur kurrë asnjë peshë në Partinë Demokratike, por menjëherë karrierën e filloi në vitin 2003, Basha kurrsesi nuk mund të lejohet nga asnjë demokrat dhe asnjë qytetar që të shkatërroj përfundimisht vlerat historike dhe simbolet që ka Partia Demokratike, siç bëri me siglën dhe logon e saj në zgjedhjet e shkuara dhe siç po bën tani duke kërkuar të zhduket nga historia 20 shkurti i 1991. /CNA.al

Dokumenti- Skandali/ Deputetët e Bashës mohojnë 20 shkurtin