Vonesa e pagave/ Rektori i UT: Veproi paaftësia, po na ushtrohet presion me bukën e gojës

10 Shkurt 2018, 19:55, Politikë CNA

Pas vonesës së pagave pedadodëve të UT, ka reaguar dhe Rektori i Universitetit të Tiranës, Prof. Dr. Mynyr Koni.

Në një deklratë të bërë publike në rrjetet sociale, Koni shkruan se ky është një veprim i paprecedentë nga autoritetet përgjegjëse dhe në këto kushte Bordi i Administrimit duhet të kishte çelur fondin për pagat nga të ardhurat e institucionit.

?Të nderuar kolegë dhe punonjës të Universitetit të Tiranës!

Jam shumë i shqetësuar në lidhje me mospagesën për punën tuaj të kryer për muajin Janar 2018. Ky është një veprim i paprecedentë nga autoritetet përgjegjëse të ngarkuara me ligj, Bordi i Administrimit dhe Administratori i Universitetit.

Në pritje të daljes së një akti nënligjor është bllokuar transferta e pakushtëzuar për Institucionet e Arsimit të Lartë publik.

Në këto kushte Bordi i Administrimt duhet të kishte çelur fondin për pagat nga të ardhurat e institucionit. Kështu që në Universitetin e Tiranës, të ardhurat e trashëguara nga viti 2017 janë të mjaftueshme për çeljen e fondeve të pagave për personelin e Universitetit të Tiranës. Bordi i Administrimit të UT si dhe Administratori i UT nuk kanë vepruar në çeljen e fondit të pagave nga të ardhurat, të paktën për muajin Janar. Kjo ka bërë të mundur që punonjësit e UT të mos kenë marrë pagat?.

Koni thekson se ky vendim vjen si pasojë e paaftësisë, ndërsa mosveprimi i tyre ka të bëjë me trysninë ndaj stafit akademik dhe joakademik të UT.

?Ky veprim i BA dhe Administratorit vjen si pasojë e paaftësisë apo mosveprimi i tyre ka të bëjë me trysninë ndaj stafit akademik dhe joakademikt të UT, ashtu siç po veprohet me një pjesë të stafit të Rektoratit të UT të cilët nuk kanë marë pagat për afro 8 muaj?.

Koni i ka bërë thirrje punonjësve dhe Bordit të Administrimit dhe Administratorit që të çelin sa më parë fondet dhe të bëhet pagesa e punonjësve brenda ditës së hënë.

?Në emër të gjithë punonjësve të UT i bëj thirrje Bordit të Administrimit dhe Administratorit të çelin fondin e pagave të muajit Janar nga të ardhurat dhe të bëhet pagesa e punonjësve brenda ditës së hënë, datë 12.02.2018.? /CNA.al