Pasaporta shqiptare për Kryepeshkopin Janullatos/ Shano: U bë realitet kërkesa jonë shumëvjeçare

24 Dhjetor 2017, 19:01, Aktualitet CNA

Anëtari i Këshillit Kombëtar të Partisë Demokratike, njëherësh kandidat i kësaj force për deputet në zgjedhjet e kaluara, Dritan Shano, ka reaguar pas dekretit të Presidentit të Republikës së Shqipërisë, Ilir Meta, për dhënien e nënshtetësisë për Kryepeshkopin e Kishës Orthodhokse Autoqefale të Shqipërisë, Anastas Janullatos.

Me anë të një postimi në rrjetet sociale, Shano, shprehet se kërkesa për dhënien e nënshtetësisë për Kryepeshkopin Janullatos është bërë para shumë vitesh që më në fund u dha për këto Krishtlindje.

“Kërkesa jonë shumëvjeçare për t’i dhënë shtetësinë Shqiptare Kryepeshkopit tonë, Fortlumturisë së Tij, Anastasit, njeriut që prej 26 vjetësh na shërben ne shqiptarëve ortodokse, për më shumë se çerekun e jetës së tij, pa fjalë dhe vetëm me vepra, duke na mësuar se ilaçi kundër urrejtjes është vetëm dashuria, më në fund u plotësua zyrtarisht! Me letra. Sepse, të jetë e qartë, shpirtërisht për ne qindra mijërat shqiptarët ortodokse Kryepeshkopi ka qënë i yni, Shqiptar në fjalë e në vepra që në fillim të punës së tij për rimëkëmbjen e Kishës Ortodokse Autoqefale të Shqipërise dhe të besimit të rrënuar në Zotin Jezu Krisht. Promotor i përhershëm i harmonisë dhe bashkëjetesës kundrejt përçarjes, acarimit dhe urrejtjes, Ai gjithnjë e ka përjetuar realitetin e ashpër të këtyre viteve në shërbimin tonë me hirin dhe fuqinë e Krishtit, për shumëkënd, të mësuar të prishte Kisha, krejt të pakuptueshme. Kryepeshkopi ka qenë gjithnjë Shqiptar për ne shqiptarët ortodoksë, ndërsa është Shqiptar i madh për shërbimin që i ka bërë Kombit tonë kur ndihmoi duke kontribuar njerëz dhe miliona në mbështetje financiare të mikpriste kosovarët që i largoheshin fatkeqësisë serbe. Nesër kur ta takoj Kryepeshkopin do ta përqafoj zyrtarisht si shqiptar.”, – shkruan Shano.

Më tej ai shprehet se “Si një prej përfaqësuesve të Komunitetit të Ndritur Ortodoks, jam shumë i obliguar dhe më duhet të falenderoj fort Shkëlqesinë e Tij, Presidentin e Republikës, Zotin Ilir Meta për këtë akt shtetëror prej shqiptari mikpritës, dinjitoz dhe fisnik, që çan përmes tymnajës së ngritur të frikërave, fobive, dogmave osmano-komuniste, vobektësisë dhe pafuqisë së shpirtit dhe mendjes dhe hileve të vogla që kanë penguar plotësimin dhe më parë të kërkesës sonë të kahershme. E falenderoj se më dha mundësinë mua dhe të gjithë besimtarëve ortodoksë në gjithë Shqipërinë ta shohim Kryepeshkopin drejt në sy siç na takon, jo me sytë ulur përdhe siç kemi qenë deri tani për shkak se politika dhe zyrtarët e saj e kanë patur më të lehtë të bëjnë shqiptar aktore e sportiste të ndryshëm sesa Kryepeshkopin tonë që na ka shërbyer ne, dhe gjithë kombit shqiptar kur e ka lypur ora.”

Ai e mbyll reagimin e tij me një lutje drejtuar Zotit për të bekuar Shqipërinë dhe të gjithë shqiptarët.

“Beko o Zot Shqipërinë dhe gjithë shqiptarët!”, – shkruan Shano. /CityNews