FMN-ja grusht qeverisë Rama

2 Tetor 2017, 18:31, Aktualitet CNA

Në një raport zyrtar shpërndar për mediat FMN-ja ka kryqëzuar sot qeverinë shqiptare në lidhje me borxhin publik, konsilidimin fiskal, detyrimet e prapambetura, rritjen ekonomike si dhe tentativën për të bashkuar Doganat me Tatimet.

FMN-ja, “godet me grusht” Qeverinë Rama, duke theksuar se PPP-ja, pra Projekti i Investimeve të Partnetritetit Publik Privat, që shkon në vlerën 1 miliardë euro, do të sjellë rritjen e borxhit deri në 7% të PBB-së (Prodhimit të Brendshëm Bruto). Ndërkohë që Qeveria ka deklaruar uljen e borxhit në 63% deri në 2021-shin, nxjerr një projekt investimesh, që nuk e ul por e rrit dhe e çon në rreth 75% ose më tepër borxhin publik.

FMN-ja thekson se konsolidimi fiskal është zbehur.

Një pikë që FMN-ja thekson është se detyrimet e prapambetura të Qeverisë rriten duke shkuar në rreth 120 milionë euro.

Një problematikë tjetër është edhe rimbursimi i TVSH-së, e cila kap një vlerë prej të 0.3% të PBB-së.

Rritja ekonomike do të ulet vitin e ardhsëm thotë FMN-ja, duke theksuar uljen e investimeve të mëdha me projektet energjitike të cilat përfundojnë vitin e ardhshëm.

Shqipëria ka vështirësi për shkak të borxhit të lartë publik, nivel të ulët të kreditimit, institucione të dobëta që frenojnë investimet, të gjitha këto kërkojnë politika dhe thellim reformash strukturore për të përmirësuar klimën e investimeve.

Të gjitha komentet e bëra nga FMN-ja, tregojnë qartë se pamja nuk është ashtu siç pretendon qeveria dhe Kryeministri Edi Rama. Ekonomia shqiptare është e brishtë dhe e varur nga investimet e përkohëshme siç ishte, TAP dhe Devoll HidroPower. Nuk ka një klimë të shëndoshë për biznesin. Stabiliteti makro-ekonomik ka shumë pikëpyetje. Borxhi publik ndryshe nga sa na thotë Kryeministri, mund të rritet më tej dhe FMN-ja i kërkon qeverisë të thellojë reformat strukturore e jo të bëjë aventura me PPP, të cilat mund të thellojnë borxhin publik dhe të rëndojnë zhvillimin ekonomik të vendit.